11

Ɓay mi hewtii ka suudu, mi tawi yumma an fooyii haa ɓe tilfike. Mi inni kissan : « Mahin ka labutaani. » « Ka labutaani ? Wano honno ? » « Hay si on maapaaki neene, miɗo anndi no yaareten. » Hiɗa anndi ko honno mi naɓiri ɓe ? Mi bammbu ɓe haa ka labutaani.

      Gila ka suudu amen haa ka labutaani ko kiloo jeenay, telen sappo. Ɗun ɗon fow men seppu. Palannde kala ko wakkilaare. Tuma mi ronki woo, mi cippitotono haa mi wallina yumma an ka leydi mi fowtoo. Si men fokkitii mi jiccoo wa ladoowo mi bammba ɓe si mi immoo men fokkita. Miñan no ɓadotonoo lan saa’i kala wi’a lan : « Mahin tun woɗɗaa fota. » Ɗun non o wowlananno ɓuri laabi jeɗɗi. Nettaali men hewti.

      Ka labutaani, men woonuno emmbere leereeji tati maa nayi meɗen jooɗii ka habborde. Ko ɓawto ɗun ñawndoowo ari inni men wonnde ma yumma no mari ndiyan sakkuɗan ka nder manndu, o tentini wonndema ko embere liitirji ɗiɗi. O winndi lekkeele soodeteeɗe, o watti ɗon wonndema meɗen waawi ruttaade. Mi inni mo : « No woɗɗi ka men iwi. » « Awa, jooni non mi nattay yumma mon ka hoore moto an, an e miñan maa seppon hooton. » « Awa », mi jaabii mo.

      Min e miñan an men wattii e maggal, meɗen seppa, gunnda, yewtora.

E hino lebbi jeenay ka nder teege e ko fawi. Leloo ka hoore ɓernde, bammboo ka ɓaawo e nder duuɓi jelu ? Loota fagga haa mawna. Ko ɗun si menen fulɓe ɓen men wi’ay e nder tinndol:

            Hay si neɗɗo bammbii yumma mun

            o seppi haa ka suudu kaaba,

            o yuɓitataa be yeru gabbun jarra

            e ko ɓe waɗani mo kon.