22

Mawɗo mo mi wonumaa yewtude fii mun on, mi anndaa, ko mo duuɓi jelu. Ko telen cappanɗe jeegoo, maa cappanɗe jeɗiɗi, kono mi waawataa fellitude. Mi waawataa hottaade duuɓi. Gine ka amen mi ɗuuɗataa yi’ude nawyirɗo non. Ko woni tun sooduɗo lan on heccay yeeyuɗo lan on e kadi waare makko nden kadi hari no ɓuri juutugol.

      Otowal ngal men, kat-katwal, mi ƴawi mi joodii ɓaawo, mi yeggitii ko men yewtunoo, mawɗo on no waawi seeɗa faransiire, kono mi faalanooka men yewta. Hari ko jemma, aduna on niɓɓiti pit e mi anndaa ka men yahaynoo. Miɗo waawunoo mo lanndaade, kono mi waɗaano

      Miɗo annditi, wonndema o darino yeeso damal njandi moolanaangal. Men jippii, men seppii haa e yeeso caaliiru paani. No nder mayru, donngal gerto herayɗe ɗe deƴƴataa. Mawɗo on ɓadii tun, gertooje ɗen, ɓuri teemedere grto feetuɗe fen, ɗe giddi e makko o fullaniɗe kisan ko ɗe soppa. Mawɗo on rutii ari binnde an, o wi’ : « A yi’ii ? » « Eyyo ! », mi jaabii. « Ko golle maa ɗen nii faggugol gertooje ɗen laabi ɗiɗi e nder ñallal ngal. » Ɗun non hari ko guɓoy cewkoy, honno wi’antee lan… eyyo, kaaba. « Ko wattii ɗon, ko yo a hoccu boofooɗe ɗen wattaaɗe ka nder albiyolje. » « Awa. » « Ñannde woo ñannde, mi aray mooɓugol albiyolje ɗen, mi addanore ko ñaamaa. Si wonaa ɗun a ƴakkay guɓe kaaba ɗen. » « Awa. » « Awa en janngo. » « En janngo. » Mi woni ɗon e nder ngii caaliwii wonndude e teemeɗɗe gerto.

      Ñaamidugol e gerto, waalida e gerto, waɗida ko woniwoo wonndude e majje. Ɗun kadi mi waɗii ɗun.

Bimmbi mi fini law, ɗaanagol e sifa nden nokkuure welaa fii. Gertooje ɗen no jokki tun no hera, e min kadi miɗo miijoo fii Alhassana miñan an. Mi immii law, mi kutii miran nenndi e guɓe kaaba, mi werlaniiɗe, miɗo nodda ɗe, kur-kur-kur.

      Ɓay mi gaynii ɗun ɗon, mi naati e hoccugol boowo. Wonnde miɗo hebbinayno kartonji cappanɗe tati e jowi, wonnde cappanɗe nay. Si niɓɓii mawɗo on ara, addanora lan biskiti buy, e bireedi, e njam dimɗe. No o hewtiri mi jarna mo. Ko hasii kon men yewtataa si o arii. Nde mo ruttoo, o sokay laaki on nde laabi ɗiɗi : klak-klak.

      Bimmbi mun ko wano non non : kur-kur-kur, hoccugol boofo, waɗa ka karton, mi waaloo, mi immoo, kur-kur-kur… Ko ɗun wonunoo golle an ɗen. « Mi waɗay kala ko mawɗo on lanndii lan, no gasa o rutta miijo fii an, o faama wonndema ko mi neɗɗo dimo belajoo o wallitoto lan. » Kono nde wonnde hiɗa miijo goɗɗun, wonta goɗɗun.