12

Si tawiino mi lanndeteno, mi suɓotanooko wonugol dikkuru. No gasa jatturu maa toola. Goɗɗun goo doo ko wonaa dikkuru. No gassa wa’ataano nii. Kono ɗun ɗoo ko muyɗe alla, alaa ko mi waawi. Ka suudu ko min attii hewtu si Alhasana miñan an hikki ɗon.

      Ko mi yahi Labiria, hari Alhasana miñan an ko ɗayɗo kono jooni o fuɗɗii faamude seeɗa. Mi tawii kadi o fuɗɗii mawnude, wurin o mawnii. Ko nii wa’ataa si tawii ontigi wonii dikkuru, ko bee tere makko ɗen laya. Jannayɓe mo ɓen fow wattii lan innude wonnde paykun kun no mari haqqille, himo faama ko yaawii.

      Ñannde men naɓunoo yumma an ka labutaani, o lanndii lan : « Kotoo jooni non ko honɗun waɗataa ? » Kotoo ka haala amen ko ɗun innoton e euskara anaia handia. Mi jaabii mo : « Fannii neene no nawni mi yahataa hay e nokku, en wonay ɗoo, mi yahataa Labiria. » Alhasana wi’aali hay e huunde kono tawi himo weltii fota. O watti moosirde toni e gite.

Alhasana dawayno yahude ka lekkol, ɓay no woɗɗi e hoore ɗun palanɗe ɗen mawnaa e hin no ɓuri kiloo jeenay, e hin-le ko duuɓi sappo-e go’o o mari. Ñannde goo mi neldi mo welooru, ko ndun o yaaraynoo heña o arta. Nde himo arta, si o anndii wonndema miɗo ka woyndu, miɗo wuppude conci, o ɓadotono lan o wallitoo lan golle ɗen.

      Alhasana no anndi no men fewndori non, huunde o lanndataako lan. Miɗo sutii faaleeji makko ɗin wano paɗe kesse, conci kesi wano wonirinon hari goreeɓe makko ɓen no jogii. Kono ɗun e ɗun mun o lanndotanooko lan. Ko e gite makko mi yi’aynoo, mi soodana mo fii yo o ɓurtu wakkilaade ka lekkol. Baaba’en wasiyino fii ɗun ɓe maaki : « Iburaahima eto no etortaawoo haa miñan maa Alhasana jannga. »

      Jooni non tumawoo mi annditay ɗun.