8

Kono mi yiltitoo ɓaawo seeɗa, sabu mi yeggetii yewtugol fii goɗɗun ɓaawo ko wontiri ɓaawo fewndo mi wonunoo Garda’iya. Ko mi wonu maa sifanaade kon no metti sifaade e kadi no hitti lan. Si tawiino miɗo waawi yewtirde wa Emi, mi heɓɓayno konnguɗi newiiɗi, kono ɓay ko mi Iburaahiima, yo mi etor gonnguɗi an ɗin. Miɗo tamƴinii a faamay.

      Adi mi yahude Libii, hari mi anndindiri e yimɓe ɗuuɗuɓe Garda’iya, kono ɓay mi artii, buy faytanno. Woɓɓe watti innude wonndema mi feetii, mi ronka jaabaade fii kala hari miɗo nanude : «Iburaahima, jooni feetii. » Ko ɗun ɓe wi’aynoo.

      Aranun hari miɗo ɗuuɗi haala, e kadi hari mi kirɗinay. Kono ko mi iwti Libii, hari mi wa’ii wa mboboojo. Sabu hari ñiire no muusa lan, hoore kadi. Hari hoore no muusa lan e ɓanndu ndun fow. Ka tigi-tigi, muuseendiiji ɗiɗi ka hoore. Araniri ndin ko Alhasana, ɗimmiri ndin ko yumma an. « Ko honno mi siforanta yumma an ngol konngol nofarase ? Ko honno mi humpitirtaɓe kabaaru on ? » E nder ko mi miijitotoo kon fii jaabaaji lannde ɗen, mi tawi : « Jooni ngurndan ɗan hittaa e an. »

      Kono huunde mi alaano e wowlude. E mi alaano e waɗude hay huunde. Miɗo jooɗii, maa waalii, miɗo nana : « Iburaahiima feeti. »

      Ñannde goo, goreejo an y’iimmi tun, innin-mi : « Iburahiima, hannde miɗo nani goɗun. » « Honnɗun ? », mi lanndii mo. « Mi nanii yimɓe ɓen no yewta fii maa ka Trankilo, ɓe inni wonndema a feetii. » « Eyyo, ko goonga maɓɓe, hari an a faamaali ? », mi hoolini mo. Alaa, hinaa goonga. Mi ɓeyditi : « Si tawii ko goonga ko no ɓe yewtir maa non, wonnde mi feetii, ɗun no rewumaa ? » « Oo’o. » O deƴƴi. « Hiɗa jogii sigareetiwol ? », mi lanndii mo. « Eyyo. » « Okkin gootol yanndi. »

      Mi huɓɓini sigareetiwol ngol, mi deƴƴi. Feetuɗo ko wano nii, alanaa ma doole fii hay huunde, gooto haajaka e ma’a. Mi suɓii wonugol kañun tun.

Ɗo’o kadi, mi jooɗotonon min tun e miijitagol : « Ko honno mi wuurirta ngurndan an ɗan ? » Mi sattinoo, mi ndaara binnde an, nano e ñamo. Mi annditi Baaba’en no maakanaynoo lan : « Neɗɗo no o wa’iwoo ko o tummboojo, no woodi ɓuruɗo mo, no woodi mo o ɓuri. Aduna on non ñiɓori, a wi’ataa ko an ɓuri fow tampude. »