17

Hari ko saa’i jeegaɓo bimmbi, no mi waalornoo, mi ɗaanii. Ɓay leere ɗiɗi maa tati feƴƴii, ɓuraali ɗon, mi maƴi : « Alhasana ? Miñan an ? » Ko bee mi yiita jurol makko. « Alhasana ? Miñan an ? » Mi ndaari gooto kala ka hikkori. Kono mi yi’aali mi wi’itii wonndema, « Alhasana alaa ɗoo. » Mi yalti ka ɗatal e ɗaɓɓitugol.

Taf-taf. Ɗatal Sabrata, nanndaa e ɗatal Konaakiri. Sabrata a yi’ataa hay e gooto, cuuɗi korooji ñakkitiiɗi. Nde wonnde wonnde, yi’aa pikkopuwal no uuya feƴƴa, nanaa hito loowale. Taf-taf. Ko fow non. Neeɓataa deƴƴa. Libii ko nii, wa’i hinaa nokku ka ngurndan newii.

Hari miɗo jogii mbodo hun (foto) kun mi woni e hollude yimɓe ɓen mi lanndoo ɓe : « Miñan an Alhasana, a yi’ii mo ɗoo ? » Woɓɓe e maɓɓe ƴetta foto on ndaara, jonnita lan, ɓe inna : « Mi yi’aali ooɗoo. » Woɓɓe inna : « Eyyo. » « Eyyo ? » « Eyyo, miɗo anndi mo, kono mi wayrii mo yi’ude, jooni hinaa ɗoo o woni. » Woɓɓe wurin hawjere mun nden jaɓataa ɓe daroo.

      Paykun goo kañun inni lan : « Baaba Hasan ko neɗɗo gooto, kono hinaa daaka gooto o jogii en nder leydi Libii. Himo mari cuuɗi buy. E nder Sabrata himo mari cuuɗi ɗiɗi, e nder Zawiya ɗiɗi, Tiripolii kadi goɗɗi. » « Eyoo nee ? » « Eyyo, Baaba Hasan no mari jawdi moƴƴa non, o heɓɓay tun e gere lumbino ngon, o sooda cuuɗi kesi. »

      « Eyoo nee ? »