7

Muusu ñiiƴe ko Jaawiya fuɗɗii lan ka nder kula gerto. Muuseendi ndin jokki lan haa Garda’iya. Mi jiɓotono si mi seedayno e ndin muuseendi. Mi sikkaano mi seeday e mayri, sabu hari ndi alaa kattannde. Jemma e ñalorma hari mi accii ɗaanaade.

      Mi yahuno ɗaɓɓugol lekki, tawi mi jogaaki mbuuɗi, ɓe jonnaali lan. Ɓe inni lan tun, « feƴƴay », kono feƴƴaano wano ɓe wowliri non. Hari miɗo faalaa maayude hakke muuseendi. Mi torotono Alla fii yo mi maayu. Eyyo, mi toroo Alla. Mi faalanooka hannde kadi luttude ɗon, ko honɗun mi waɗata ɗon ? Mi miijoo wonndema mo maayii, haray lannii o ɓuttinii. Gooto waɗataa ma ko boni, gooto piyataa ma, gooto yennataa ma. E kadi a weelataake a ɗonɗataake. Ko sifa ɗii piiji fow mi miijotonoo.

      Mi yalti ka hoore laawol, mi ɗaɓɓi ɓoggol. « Miɗo faalaa kallangol », mi lanndoo yimɓe ɓen. Mi watta ɗon, « kallangol sattungol e tiiɗungol. » Hari hay gooto alaa e faamude lan. Mo mi haalani woo feƴƴa acca lan ɗon, wa’a wa si o yi’aali lan, maa wa si mi wowlaali hay huunde. Mi watta ɗon : « Jaaraama buy. » Ñallal ngal fow miɗo ɗaɓɓude kallangol, kono hay e huunde, hay e gooto jentaaki lan, hay e gooto jonnaali lan.

      Mi sakkitori yahugol ka werde Ivu. Ivu Iwaarinaajo (mo koddiwaar), himo golla e Trankiloo nokku ka wi’etee ɗon Garda’iya. Mi naati mi yi’i tapii njano wano oo moketti waaliiɗo ɗaa. Kono ɓuruɗo mo juutude. Gaaraaji ɗin ka lefol tapii lompii ɗi fuɗii bonude. Mi pooɗiri gaarawol goo wonndude e doole, ngol fow ngol yalti. « Mi ndaaray si tawii ngol ɗoo gollay. »

      Mi adii ka go’o, mi waɗi finnde e gaarawol ngol. Ɗiɗi, mi maɗɗii, mi halli e ñiire nden, mi ŋati haa satti. Ey, ɗon ñiire nden jogaama. Tati, mi haɓɓi ngoya senngo gaarawol ngol ka koyngal an, wano nii. Nettaali mi fonti koyngal ngal ka mi ƴoɓiiɗon, mi hayliri nano e ñaamo, nde fuɗɗii dimmborde wa ko waalii e dimmborɗi. Mi jokki, mi fillifillinnii. Laabi buy. Nettaali, mi immii, mi darii. Krak. Nde futti ka leydi. Ñiire nden e gaarawol ngol.

Senngo yeeso an ngon fuɗɗii ɓuutire wa laakun wuttetee kun. Gila ka huupuru haa ka tiinde. Hay yiitere an nden accii yi’aade, nde mutii ka nder teewu wa sokiinde. Ko non mi woniri e nder jonte ɗiɗi maa tati. Ko ontuma ko ɓuuti kon doli muuseendi ndin a nder hunnduko samori.

      Ɓay mi sellii, mi ndaari mi tawi ko bee mi fuɗɗoo gollugol. Mi immii, mi yahi ka sera ɗatal ka Isma’iilahun hollunoo lan ɗon. Mawɗo nayeejo ɓadii lan, lanndii si tawii miɗo waawi jiiɓugol siman. Mi jaabii : « Eyyo, miɗo waawi. »

Ñallal ngal fow miɗo jiiɓude siman, lakkere nden ɓeyditi lan giyaa on. Si mi innii giyaa, ko faale wuurugol mi faandii. Mi fuɗɗii heɓude mbuuɗi, mi fuɗɗii faamude wonndema miɗo haani heɓude geɓal e oo aduna.

      Kono ka hoore aduna, nekkeeli ɗin no ɗuuɗi. Wonunooɗo jiiɓude siman binnde an wi’immi : « Yahen Alje, ko ton golle ɓuri weeɓude e kadi ɓen ton yoɓay ko tiiɗi. » « Awa », mi jarnimo.

      Golle ɗen lanni tun, mi sutii ka daral. Gila Garda’iiya heɓi Alje ko dinaar wuluure e teemeɗɗe ɗiɗi. E leere noogay e ɗiɗaɓo on mi iwi Garda’iya, mi naati Alje ka subaka.