5

Jooninon mi anndii wonnde ma si neɗɗo maayii o ɓuuɓay jop. Maa hara o ɓuuɓay jop si o maaya, lannaa lan laaɓannde. Miɗo faalanoo yahude sifanoo ɗun yumma an lanndoo waajuuji seeɗa wano wi’ugol : « Neene, ko honno mi warrata ngurndan an ɗan jooni ? »

      Miɗo marunoo baba-mawɗo gooto Konaakiri, mi yahi ka maɓɓe. Mi anndini ɓe wonnde baaba’en feƴƴinii, miɗo faalaa yahude ka fulawaa mi hiwroyoo yumma an. Kono ɓe jaabii lan wonndema ɓe alaa mbuuɗi. « Oke », mi jaabii ɓe, mi hooti ka suudu.

      Suudu amen ndun hari hino fanɗi, ko belorde wootere. Kuri alaa ton. Ko tummbun ka juulee e yeru danki kin ka woni ɗon. Min ko ka leydi mi waalotoo e hoore gatun.

      Lewru kala, baaba’en an ko guluuji teemedere faran yoɓata fii suudu ndun (looseman), ɗun ko mbuuɗi eroo sappo pet. Eyyo eroo sappo no wa’i wa si no weli fii, kono welaano fii fes. Ko honno mi warraynoo fii yoɓugol njoddi suudu ? E ko honno mi gerdaynoo fii paasi yahugol ka yumma an ?

      Miɗo jooɗii ka ɓorɗi, miɗo miijitoo fii ɗii piiji ɗoo ɗiɗi. Tentinii ɗimmo on. Hari tammo no ton, mo no anitoo lan, sowndo kala, mo mi waawaali seedude e mun. Ko baaba’en an e noone no ɓe ɓuuɓiri non. Ko ontuma non mi wulli.

      Nettaali kawtaljo ari, watti ɗon ɗimmo. Yaari non haa ɓe ɗuuɗi. Hari hinaa alɗuɓe, men fow ko e kartiyee gooto men hoɗi ka seraari Konaakiri. Ko yimɓe moƴƴa ɓerndeeɓe. Ɓe fawi junngo e hoore e jiiba ɓe mooɓindiri mbuuɗi fii yo mi waawu yahude ka yumma an. Mi inni ɓe : « On jaaraama buy. » Jaaraama buy ko ɗun wi’oton ka haala mon « mila esker. » « Ɗun hinaa huunde », ɓe jaabii lan, « yo alla firtu arsike. » Arsike an on, mi moɗii mo et mikkitannde mawnde, mi nangii ɗatal.