15

Serekore ko innde laral e saare e nder Hawtaandi Gine. Hakkunde mayre e Konaakiri ko kilomeeterji wuluure e teemeɗɗe tati. E nder duuɓi tati maa nayi ko ton mi yahaynoo e kamiyonwal, sabu hari doginoowo ngal no ƴetti-mi karallo. Yaadu ndun Konaakiri haa Serekore ko yontere men waɗi ardu ndun kadi wano non. On gorko doginoowo, o wallanno fota, sabu ko kanko ekkitim-mi dogino kamiyon.

      Miɗo anndi ñannde goo, kiikiiɗereere meɗen yahaynoo Banakoro, rewrude ka fello. Kamiyonwal ngal hari no ronndii fota, moter on ko karahan wonunoo e yaarude. Mi anndii pellet ngal ronkii, miɗo fanki ɗon. Tun nde wootere mi nani no waɗa ka-ka-ka… Meeter an inni yo mi cippo mi ndaara ko honto woni e waɗude hito. Mi hoccii mi cikkii, mi inni : « Wattu permiyee, yaaru doy. » O waɗi ɗun, fahin hito ngon waɗiti ka-ka-ka-ka … Watti kadi. Mi inni : « Ko ley woni e iwrude, ka ƴanngal (pon) ɓaawowal. » « Ruuleman on bonii », o jaabii.

      Men darni kamiyonwal ngal ka sera, men darii ka tummbo ɗatal, fii mono feƴƴude yo o anndu fii amen. Men woni ɗon yeru minuttaaji noogay, cappanɗe nay, leere gooto. Ko wonunoo e dillude woo, ko saa’i. Ko tummbere jemma mo moto ari, men darni mo. Meeter an yaadi e makko Banankoro soodoygol ruuleman kesso. Min mi woni ɗon, mi ayni kamiyonwal ngal.

      E nder balɗe ɗiɗi hari meeter an arii.

Jooninon mi anndii wonndema si ella waɗii e moter maa e ƴanngal. Mi anndii kadi hito moter on tuma ngo wayli. Kono si tawii ella on ko elektiriki haray huunde mi faamataa e mi anndaa ko waɗetee. Doginngol, eyyo ɗun ɗon miɗo waawi seeɗa, nde wonnde wonnde meeter an acciday lan e walan on yeru kiloo tati maa nayi, si tawii kamiyonwal ngal waɗoraa e si tawii men ɓadaaki e wiiraasi. Meeter an innayno lan : « Iburaahiima addanii lan bidon ndiyan. » Mi yaha mi addoya bidon ndiyan mo liitirji sappo. Ko kun bidon hun ɓe fawaynoo ka hoore jullere. Ɓe inna yo mi jooɗo e hoore makkun, ɓe jonna lan walan on.

      Ko nii mi ekkitorii doginngol.