2

Laawol Gao no woɗɗi, ngol welaa yahude. Nguleendi ndin wulnay wiitirje ɗen, mo takkii nowru e majje o sumay. Kaaruwal ngal darataako hay si a ɗaaniike. Ngal darataako, hignal yaha tun yeeso-yeeso jemmaaje heewuɗe.

      Jemmaaje ɗiɗi, jemmaaje tati, si men hewti Gao.

      Kaaruwal ngal darii binnde ƴanngal (pon), men fow men cippinaa ka gaanin. Binnde soofaaɓe malinaaɓe, ka gaɗa no darii capaaɓe (tuareegi). Mi yi’iɓe ɓe fow hiɓe jogii pinkaaje. Kala e maɓɓe no kippi pencen mun on wa fewndo gere. Ɓay men hewtii ɓe ɓaaƴindiri, ɓe faamondiri.

      Eyyo, harii ɓe faamondiray fii lummbugol ngol e lummbinngol safaariyankoo ɓe ɓen.

      Kaaruwal ngal acci men ka ƴanngal ɗon, binnde suufaaɓe malinaaɓe ɓen. Ɓay mi faalaa lummbude, suufaajo wi’im-mi : « Daro ɗon. » Otowal « pick-up » tuareegiɓe ɓen iwri gaɗa ari ƴettin-mi gaanin. Yeeso soofaaɓe malinaaɓe ɓen, ɓe y’ii kono huunde ɓe wi’aali.

      Ka nder pikoopuwal, ko men jeenayo. Ka hoore laawol gorko jogiiɗo finkaari fuɗɗii lan lanndaade : « Muusaa Ons kaa Muusaa Kone ? » Be ɗiɗoonon ko ardiiɓe, ko kamɓe ɗiɗo ardii ñamnaage maali fow. Jooni ɗun wonii ko mi anndi, hari non mi anndaano ɗun. Ko ɗon mi fuɗɗii nanude ɗen inɗe. « Mi anndaa hay e gooto ɗoo », mi wi’i mo. « Ko Alserii faalaɗaa yahude ? » « Eyyo. »

      Kono ɓe naɓaali lan.

      Pikoopuwal ngal darii e binnde gimmbal mawngal. Wonannde jokkuɗo gimmbal ngal, ka tummbo no udditaa ɗon baafun toso kun. Ɓe rewni men ɗon wonndude e duñeede : « Naatee nder ton. » Ka nder ton, teeren njano howaaɗo fawaa wayaaji. Ko tummbo teerain, yimɓe buy, yimɓe sokaaɓe. Mi anndaa hari ko men njelo, teemedere e cappanɗe-jeegoo, maa teemedere e cappanɗe-jeetati mi anndaa. Si jamaa on ɗuuɗi welaa limude. Hara ko men buy. Fow no wa’i wa min.

      Aynuɓe ɓen lanndii men jawdi : « Yoɓee, si a yoɓii a yahay Aljerii. » Ɓe ɓanti pinkaaje maɓɓe ɗen : « Si on yoɓaali men fella on. » Wonunooɓe e waɗude ɗun hinaa fayɓe, ɓe fow hiɓe hecci lan. Hari hiɓe anndi ko ɓe woni e mun kon.

      Mi yaltini cokku dammi tati yumma anɗin, guleeje temeɗɗe jeeɗiɗi faran Gine yeru eroo cappanɗe jeeɗiɗi. « A alaa ɓuri ɗin ? » « Alaa. » Innde annden winndaa e hoore ɗerol kaydi, ɓay balɗe feƴƴii, kamiyonwal arani men.