21

Bimmbiire Bari innin-mi : « Iburaahiima, mi saatinii eɓɓoore lumbino, miɗo torii Alla yo laato, ko ɗon mi faalaa yo a tawe. » « Awa, ella alaa. » Men haldi coggu ero guluuje ɗiɗi. Ko coggu yo mi lummbu non. Ero guluuje ɗiɗi e wonugol kurkaadu nder suudu e nder lebbi tati.

      Kiikiiɗe, o naɓi lan ka pencen. Fii wuttugol laakun kun dame jeenay wuttirɗe. E ko njeenayo wuttata kun. Ko yo a wuttu haa wemmboɗaa, wuttiraa pompi dammpiteeɗo, wuttiraa pompi juuɗe, wuttiraa henndu jope maa ɗen fow, wuttaa, wuttaa, wuttaa, wuttaa. Haanii no anitoo lan sowto wuttaango ngon : ful-ful-ful-ful-ful. Fow waɗii woo tuma tawi hiɓɓii. Wutta laakun kun, joɗɗina moter on, junnee busoolu on, duñee ka nder ndiyan. A yahay. Oo’o habee, hinaa jooni woodii ko mi yeggiti.

      Poliisi marokunaaɓe ɓen no jogii loŋorɗe dolnuɗe. Ka ɓe jooɗii ton ka hoore fello, hiɓe ayni fow. Menen kadi hari meɗen anndi hiɓe sutii men, ko honno men woni e hebulorde no men yaara, Ɓe fuɗɗii kisan sonkude. Aarabuuɓe ɓen jokki ko wuttata hay alaa taƴndirde, ful-ful-ful-ful-ful. Ɓee aarabuuɓe no waawi ɗun.

      Si aroyii tawii ko bee laakun kun wuttee, ɓay wonnde nde no lummbee henndu ndun no ɗuytoo. Lummbooɓe no nder ton ko waɗa ɗun, wurin meɗen feƴƴiti ko kun gasata ronndaade kon. Ful-ful-ful-ful-ful. Haray gasii. Ko men cappanɗe jowo e tato worɓe et e rewɓe e ente.

      ...wattee moter on, jonnee busoolu on, duñee kun ka nder ndiyan. A yahii. Jooni non. A yollike hakunde peɗaali foɗoore nden maa nden.

      Ndaaraa cenɗe ɗen nayii non, fow ko gootun : ndiyan. E an hara haa hannde a jooɗaaki e hoore baharu. Neeɓataa moter on ɗaanoo. Sabu doginoowo wattitii noone, maa ko hommbo anndi ? Kono o darike.

      Ɓe fuɗɗii pooɗude ɓoggol ngol, ɓe pooɗi, ɓe pooɗi, ɓe pooɗi haa ɓe ronki kof, ɓe pooɗi haa ɓe taƴii. Nettaali kun huɓɓi. Men yollii e majjan. Si on yahii seeɗa, ndaara non binnde maa fow, ndaaraa cenɗe ɗen fow, fow ko gootun, baharu, e an a waawataa fubbaade. Ko e nder ɗun busoolu on darii.

      Adi men ɓoraade, hari aarabuuɓe ɓen sifanike men wonnde, « si meselal busoolu on no hakkunde fus e sappo e jowi haray meɗen e laawol moƴƴol ngol. Kono si meselal ngal woni hakkunde sappo e jowi e cappanɗe tati, hinaa laawol moƴol ngol. » Ko woni mi anndaali ko waɗi kono goɗɗo innii lan : « Busoolu on darike. » Jooni non men yahay tun woni men wonndaa e limoore woo.

      Men majjii ka tummbo bahru.

      Ndaaraa cenɗe ɗen nayi, fow ko gootun, maayo ngon e luggeendi mun, nde wonnde kunte teewu no maƴa nder ton yollitoo. Goɗɗo fetti : « dofen. » Kono min hari haa hannde mi nanaali ngol konngol, mi huli; mi sikki ngii yanay jooni e hoore an.

      Ohhhhhh…

      Haqqile an ɗen maƴi. « Alhasana ko nii yaarunoo e kiikiiɗeere. » Mi annditi fii ɓeynguure nden fow. Ko adii kon taho baaba’en an, hikki yumma an watti minñiraaɓe an ɓen, Binta e Rugiyatu.

      Mono jooɗii ka tummbo baharu, haray ko e peccal gootal o woni. Immaa ko ngurdan ɗan, immaa ko mayde nden. Yulirde goo alaa hay e nokku.