18

Mo no wuuri ka ley leɗɗe, woni ko Tanje, maa ko Nador, ka woni woo, yo tawu tun ko e ley leɗɗe, leɗɗe ɗe goɗɗo yi’ataa. Leɗɗe ɗe tawataa gooto kala no ronndii gonnngal. Yimɓe ɓen no deƴƴi. Hay e gooto wowlataa. Mo ndaaruɗa ka nder gite woo, a faamay wonndema no woodi ko o soomodii. Daɗugol poliisi on no weli fii kono ko ontigi soomodi kon welaa fii.

      Nden huunde soomodaande, ko mo kala e taarikahun mun.

      Min mi miijanooki setagol, hari miɗo ekkitaade doginngol kamiyon, miɗo miijii si mi jokkuno ɗun seeɗa, hanno mi fuɗɗiino gollude. Wonndude e ɗen mecce, harayno mi waawii dankaade ɓeynguure nden hara mi iwaali Gine. Hari ko faandaare an nden non. Kono miñan an yalti, ɗun wonu sabu ko waylin-mi fodoore nden.

      Aljerii mi nodduno yumma an, hari ko alkamisaare, mi inni ɓe, ɓe yi’itataa Alhasana mo maɓɓe. Ɓe fuɗɗi kisan wullugol. Ontuma ɓe wulluno fota. Ɓaawoton mi anndaa. Nettaali hari mbuuɗi ɗin lannii ka talifonhun men waynondiraano ko kelɗi. Ɓay yewtere nden taƴii, min kadi mi wulli, sabu hari, miɗo yiɗi kun paykun fota, a faamii ?

      Ko fii ɗun si mi innu maa ndee huunde nde mo kala soomodi, ko kala e kalaare mun. Ko kala e miijooji mun, kala e ŋakkereeji mun. Mono ka ley leɗɗe haray ɗun hinaa huunde. Ko wontiri kon ɓaawo maa, no woɗɗi maa, e a annda si tawii ko wontiri kon yeeso maa si no ɓadi maa, maa si no woodaa wurin. Hiɗa ɓilii hakkunde ka jeereennde e ka baharu, ka tummbo ɗon, wa kullun. Woni ko Tanje, woni ko Nador, e hino ko mo kala e anndi ko deƴƴi kon, ko soomodi kon ka nder tetekki mun.

Ɗoo kaadi miijooji ɗin no lettude lan ñannde woo ñannde e miɗo huli. Miɗo huli, miɗo huli hita mi hayru banndiraaɓe an ɓen kadi. Rugiyatu e Binta. Adi mi yaltude, hari meɗen nantondiri, welaa siforde konnguɗi. Hiɓe jentotonoo nana kala ko mi wowlunoo. Kono dumunne on pooɗike, neeɓii ko mi yalti, saa’i no wayla ko woni woo.

      Ko fii ɗun si tawii tuma mi heɓunoo feere woo, miɗo noddaynoo yumma an, mi lanndoo ɓe : « Minñiraaɓe an ɓen no e jam ? » Yumma an jonna ɓe talifon on, ɓe lanndoo lan : « Iburaahiima hiɗa annditi fii amen haa jooni ? »