20

Ñalorma e jemma goɗɗo no aynin-mi. Miɗo ugginii fewti ka maadi. O inni yo mi noddu ka an, mi nelana mbuuɗi. « Mi alaa ton gooto mo mi nodda. » Kono loppol makko alaa e dun. « Mi alaa baaba, e hin-le neene an ko miskin, reemooɓe. Mi alaa ton hay e gooto. » Mi haɓɓitii mi faaminay mo ɗun ɗon fow e haala aarabu. Kono loppol makko alaa e ɗun.

      Nokkuure nden ko moolanaande howiraande gimmbal mo no nder haray no sutii duule ɗen.

      E « midi », naange ngen no e tummbo hoore, hinge piyoo e njaarendi ndin. Neɗɗo dariiɗo ɓaawo an inni yo mi jicco : « Jicco fontaa juuɗe ɗen. » Mi ɗoftii, mi jiccii, mi fonti jooɗe o fawi kaaƴe ka newe an : « Si a accitii ko finkaari ndin yewtete. » « Awa. » Ko ɗon tigi-tigi on fuɗɗii.

      E nder saa’i hun nii, hara ontigi fuɗɗii anndude teddeendi kaaƴe ɗen, fuɗɗoo diwnude. E hino kaaƴe e juuɗe, e hino juuɗe e ɓernde, e hino ɓernde e daande, e hino daande e hoore, e hino hoore e ɓanndu heddindu ndun : fow no diwnude. Neeɓataa yanaa ka hoore njaareendi, njaareendi wulundi. Naange ngen, ndiyan wuluɗan ka nder hunnduko. E hoore ɗun o ƴetta finnkaari o tappe ka ɓurata e muusude ɗon, paf, paf, paf. Kono hinaa fow non, ko ko fanɗi kon nii. Wonannde on neɗɗo. Lettugol goɗɗo no wa’ani mo wa yarugol ndiyan ɗonɗaaka. Si o waraali ma, ko yo a wi’u mo o jaaraama.

Tuma kala o jonna lan feccere taasihun ndiyan. Wa fewndo ɗon, ɗonka moolanaaka no jurii lan ɓanndu ndun fow, ko fewndo ɗon o tuɓɓinta lan o tuttina. Fii majjintingol lan ɗonka kan, ko yo o lawƴan banto moolanaango o watta ɗon : « A yarii pandi. » Feccere taasihun.

      Yeru hita maayu. Sabu faandaare makko nden hinaa yo ontii maayu, ko yo o letto. Si mi maayii o heɓataa hay e huunde. Si mi maayii noddeteeɗo fii yo addu mbuuɗi alaa. Ko ɗun hari si mo tuɓɓina lan wonnde-wonde feccere taasihun ndiyan.

Pecce ɗiɗi taasihun e nder balɗe tati.

      E nder baɗe tati, jemma e ñalorma goɗɗo no letta lan. Hari hinaa min tun. Ko men teemeɗɗe maa ɓuri, mi limaali. Kono hari miɗo nanude hito worɓe e rewɓe e paykoy. Rewɓe ɓen, jemma on fow hiɓe wullude, hiɓe haacude. Si goɗɗo fankii, oya jaɓɓitoo, si onɗon kadi fankii, goɗɗo goo fuɗɗoo.

      Lettooɓe men ɓen hinaa suufaaɓe, ko wa’uɓe wa maa, wa min. Wonaaɓe e letteede ɓen ko sonnaaɓe e worɓe, wa’uɓe wa min. Hay gooto e amen maraano huunde ko waɗa e nden nokkuure. Min ko miñan an mi ari ɗaɓɓitugol Libii. Ɓeya kañun kadi ko fii no feƴƴira yaara Eroppu. Kono lettooɓe men ɓen loppaaka e ɗun.

Wurin mi faaletaake yewtugol fii ɗun. Sabu mi yewtay tun fii mun, mi yi’a kisan yeeso an ko mi woni e wowlude kon fow. An hiɗa yeeso an, miɗo yewtude ma kono min miɗo ton niini, e no mi wowliri woo, ko non anitorto lan. Ko ɓuri moƴƴude, ko hita mi yewtu fii mun. Ɓay non a lanndi lan, ko ɗun si miɗo haalande ma. E gila ka mi haalan maa ɗoo. No wa’anin-mi wa si tawii miɗo ton.