2

Baaba en an ko paɗe yeeyaynoo. Ko ka hoore ɗatal ɓe yeeyaynoo. Paɗe ɗen ko paɗe pettu ko fii ko wattee ka suudu ɗe moƴƴiniraa. Ka suudu, dogetaake ko fii ɗun. Nokku ka ɓe yeeyaynoo ɗon e ka suudu ka men hoɗi ɗon ko emmbere meeterji teemedere. Ko taabun ɓe waɗi ka binnde ɗatal. Ko ɗon baaba’en wonaynoo ñallal ngal fow. Saa’i, saa’i goɗɗo ara ɓe fuɗɗora yewtugol fii pettuje ɗen. Baaba’en weltoo fota non, weltaare nde juutataa. Si ɓe gaynii yewtude coggu ngun, ɓe yaltinayno kewoy ɗiɗoy ka ley taabal et kewun kala ɓe tufa wuddere. Baaba’en mara kewun, aruɗo on yaada e kewun. Ko no wuddere nden mawniri woo ñamaande nden foti. Baaba’en no wallinirnoo nii kewoy buy ka ley taabal, ɓe maakayno wonndema ñannde goo ɓe accitay gere paɗe, ɓe watta wuttugol tammbin. Kono ɓe accaano yeeyugol paɗe.

      Wonnde ɓe seenotono ka juulirde, ɓe acca lan min tun ka binnde taabun. Yimɓe ɓen ɓadotono ndaara paɗe yeeyetee ɗen. Mi wi’aɓe : « Mi waawataa on yeeyude, mawɓe ɓen alaa gaa, ko bee mi habboo ɓe. »

      Hari mi senndindiraa fota norɗi buuɗi ɗin e mi anndaa ko ɗi jari. Ko mi paykun, ko ɗun si mi habbotonoo haa mawɓe ɓen sentoo. Mawɓe ɓen ko baaba’en an tigi. Ko Mammadu Boobo Mbalde ɓe maaketee.

      Ko min e baaba’en an wonndi gila ko mi heɓi duuɓi jowi haa mi heɓi duuɓi sappo-e-tati ka saare Konaakiri. Gila duuɓi jowi haa duuɓi sappo-e-tati, ɗun ko duuɓi jeetati. E hin gila Konaakiri haa ka hoɗo amen no woɗɗi faway seeda e kiloo temeɗɗe nay e cappanɗe tati. Ɗun no woɗɗani yaadu paykun kañun tun. Seppotaako wonndude e paɗe pettu. Ko ɗun baaba’en maakanaynoo lan wonndema mi hewtoytaa. Ko ɗun si tawi hari ko bee mi wona binnde maɓɓe, binnde taabun kun ka sera ɗatal hara mi yi’aali yumma an.

      Miɗo marunoo weldiɗɗo heccuɗo lan seeda mo mi yiɗunoo fota non. O wi’ayno lan yo mi wowlan-mo kala ko mi faalaa. Wonnde mi lanndoo mo paɗe, o addana lan ɗe. Wonnde mi lanndoo mo ko ñaametee, o addana lan. Himo watti yiila e an wa si tawii ko mi minñiraawo makko. On weldiɗɗo an ko Muktaaru innetee. Ñannde goo mi lanndino mo yo o winnda nan ɓatakuru (leeter) fii yumma an, o winndi ndu. Men ɗiɗoonon men yaadi ka daral otooje (gaaruwatiir) men jonnoyi goɗɗo goo ɓatakuru ndun fii yo o naɓora nan ndu. Mi anndaa si ko weloo o yaarunoo maa si ko oto. Ko mi anndi tun ɓatakuru ndun hewtoyno. Woɗɗeendi ndin hinaa hay fus wonannde ɓatakuru.

      Miɗo miijoo fota fii yumma an. Yumma an ko Faatimatu Jallo ɓe maaketee. wonii leɓɓi men yewtaali wurin ɓe anndaa wonnde mi hewtii Erop.