3

Gila balɗe tati, mi ñaamaali hay e huunde, mi yaraali. Mi waawataa no. Goreeɓe an ɓen okkorayno lan ko mi ñaama. Mi innaɓe : « Yonii. » Ko ɓanndu ndun kaa ko hoore nden, mi anndaa ko honɗun e mun. Kono mi tabitaa. Mi alaa giiya. Ko yo mi jooɗo ka leydi, mi miijitoo : « Ko honto mi woni ? » Mi tawa mi alaa ɗoo. Miɗo lannditotonoo : « Ko min e hommbo woni e yewtidude ? » Mi alaa yewtidude e hay gooto. Yimɓe ɓen fow no faytinanii lan, hari miɗo fayti hay hoore an. Koyɗe an ɗen, ɓanndu an ndun, juuɗe an ɗen, fow no faytinanii lan.

      Jaaraama buy, ko ɗun wi’o ton e euskara « mila esker. » Hari mi haalanii ma ɗun. Accu hakkee, mi feetiino. Ko ɗun mi innaynoo okkorooɓe lan ɓen. « Jaaraama buy. » E ɓe alaa no lan okkorde ɓen kadi, « jaaraama buy. » Konnguɗi faytinaniiɗi lan, ko hay hoore an no faytinanii lan. Piiji fow no faytinanii lan wonii nii balɗe tati. Ka ñallal nayaɓal, mi immii, mi yalti ɗaɓɓitugol Alhasana.

      Nofaraasi, ko ɗun mi innanoo, nofaraasi, ko ɗun mi nanunoo. Kono tawi mi waawaa hoolaade ko goonga. Mi toppitii e ɗaɓɓitugol mo. Nokkuure wootere e yimmɓe nden nokkuure, miɗo lanndoo. Miɗo ɓadotonoo yimɓe ɓen, holla ɓe foto on : « Hey, miñan an, on yi’ii mo ɗoo ? » Mi watta ɗon : « Hiɗon felliti no waawa gasude, yimɓe teemedere e cappanɗe nayi e nayo e nder laakun ? » Woɓɓe jaaboo oo’o.

      Yontere yele. Balɗe sappo. Jonte ɗiɗi, tati, himo loƴoo e nder maayo.

Mi woniino goɗɗo goo.

      Miɗo yaltaynoo ko hoore ɗatal, mi inna : « Mi faalaaka hannde kadi wuurude, ko mayde ɓuranin-mi. » Mi ndaara mi tawa ngurdan fow no mettitin-mi. Hari mi feetii. Ey, feetuɗo seppoowo e hoore ɗate melenje Sabrata.

      Miɗo nana hito loowale, miɗo sutii wonuɓe e fellude ɓen, mi alaa e wattande yiili e maɓɓe. Ɗatal goo kadi. Daro ! Hito pinkaaje ɗen accii lan hulɓilde faale mayde no wara kulol. Kono hinaa few-few. E misal, hari mi faalaaka fottude e mawɗo jooma gertooje ɗen, sabu o warayno lan ɗon e ɗon, taf, nde wootere. Libii, mayde hinaa huunde hawniinde. Mi faalanooka yeɗude mo ngal polgal ɗon. Kono non hari miɗo faalaa maayude, maa hara oo’o mi faalaaka.

      Mi anndaano ko mi faalaa. No metti sifaade, tentinii sifanaade ma, sabu a wuuraali hen, sabu a anndaa Libii. Ko woni tun hari mi wontii goɗɗo goo. Mi wa’aa wa hoore an. Si aarabuujo wowlanii lan goɗɗun, mi jaaboo mo ko mi miijii kon, mi watta ɗon, « jooni non waɗan kala ko faalaɗaa, siɗa faalaa waran. » Kono o warataa lan. Mi hollaɓe foto miñan an on. Ɓe wi’a : « Oo’o. » Mi watta : « Awa. »

      Mi toppitoo e ɗaɓɓitugol mo.