7

Yumma amen no wonndi e muñal mawngal kono ɓe dolnaa. Si mi innii ɓe dolnaa ko ngalu mi faandii, si mi innii ngalu ko mbuuɗi mi faandii. Yumma an ko remooɓe ko tiiɗaa, ɓe ne’ora ɗon kadi daabe. Hiɓe mari na’i seeɗa, dammi seeɗa et cuntuhun aawateeri. Huunde fawaaki ɗon.

      Ɓay mi wi’iiɓe baaba’en feƴƴinii, ɓe maaki : « Iburaahiima, mi yeeyay na’i ɗiɗi ko fuɗɗoraa goɗɗun. » Mi jaabii ɓe oo’o, wonndema meɗen hatonjini e na’i ka suudu, sabu hinaa mi bajjo fayɓe tato kadi no gaa, kono ɓe jentaaki lan.

      Ɓay balɗe tati feƴƴii ɓe wi’i lan : « Iburaahiima, e hino mbuuɗi ɗin, guluuje teemeɗɗe jeenay faran. » Guluuje teemeɗɗe jeenay faran ɗun ko eroo cappanɗe jeetati. « Ndii jawdi ko yeñinteendi », ɓe tentinani lan, kono hari min mi faamii ko ɓe woni e wiide kon yo yeñine. Mi watti ɗon : « Neene mi wowtaa ngeengu. Mi miijitii seeɗa tawi ko ɓuri ko yo mi yahu e leydi goo, ɗo’o huunde gasataa, feere goo woo alaa. » Ɓe tamiri hoore maɓɓe nden juuɗe ɗen ɗiɗiinon ɓe fuɗii mbojjude. Ɓe lanndii lan si tawii mi faala dogude galle ɗen. « Alaa, neene hinaa ɗun. »

      Ka lannoode ɓe faami ko mi woni e yewtude ɓe kon ɓe maaki : « Oke. » Ɓe ɓeyditii piijii ɗiɗi. Go’o : « Ibruraahiima, danko hoore ma reenoɗaa. » Ɗiɗi : « Ñanndewoo mi juulay mi toroo Alla yo o reene. » « On jaaraama buy », mi jaabii. Mi yahi Konaakiri.