21

Mawɗo addunooɗo lan on ka lettooɓe ɓen, faami wonndema mi alaa ko yoɓana lan mbuudi. O yaltini lan nder ton, o ƴawni lan ka otowii makko juutungii. O naɓi lan nokku goo mo mi anndaa. E sera ɗatal, ka niɓɓiti.

      Mawɗo goo kadi tawi men ɗon. Mawɓe ɓen ɗiɗo fuɗɗii yewtugol yeeso an, fii kala mi faamataa huunde e aarabu. Aarabu ko haala mettuka fii tentinii hari yewtere maɓɓe nden no yaawi sut.

      Mawɗo ɗimmo on, ndaarim-mi yeru dumunne. Himo punnii lan. Ndaara tenƴina, gila dow haa ley, gila ley haa dow. O lanndaaki lan hay e huunde, si wonaa ndaarugol lan. Hari mi lannii hulude, ɓay hari hiɓe wakkii pinka, mi anndaa, si ko fii warugol lan ɓe woni e yewtude. Mi anndaano ko ɓe miijii. Mawɗo ɗimmo on jokkitii e ndaarugol lan.

      Nettaali o fewti ɗimmo makko on, o yaltini mbuudi kaaki seeɗa. O limi gootol gootol, o jonni mawɗo arano on. Fow-fow mun dinaar libinaaɓe teemeɗɗe tati, hari miɗo limirde gite an ɗen. Teemeɗɗe tati, mi faami kisan wonnde ngal ɗatal ko maakiti. E dinaar teemeɗɗe tati, ko ɗun mi jari. Ey ! Hari mi yeeyiraama wa mbeewa.

      Mawɗo arano on watti mbuuɗi ɗin ka ley jubba, o ƴawi ka nder oto. Hay o waynaaki lan.