24

Mi woni Jaawiya e nder balɓe ɗiɗi, miɗo lanndoo kala mo mi fotti ka nder daaka. Mi holla ontigi fotoohun : « Hey ! Miñan an Alhasana, eyoo nee ? » « Alaa. » Nafaali. Hay e gooto mi faamiraali jurol makko. Mi yiltitii Sabrata.

      Ko ginenaaɓe ɗiɗo wallitii lan, men rewri ka fello fii hita men fottu e mawɗo on. Si wonaa ɗun o waray lan, eyyo, o aamataano.

      Men ƴeewi daakaaji ɗin fow, ɗon e Sabrata, ɗiɗiji ɗin ko ɗi Baaba Hasan. E ɗi jeɗɗi goo ɗi o jeyaa. E ɗin kadi, hari yimɓe no heewu nder ton tef, ɓen fow ko habbiiɓe lummbugol. E ɓen ɗon fow, mi yi’aali yi’uɗo miñan an. Goɗɗo wi’in-mi : « Yahu Sirte, maa Triripoli tefaa, no gasa hara himo ton. »

      Mi waawaano yahude sabu hari mi jogaaki mbuuɗi. Ko goreeɓe an ɓen okkoraynoo lan hay ko mi ñaama, ɓe tama lan sayre lacciri ka nder newre.

Mi waɗi lebbi ɗiɗi Sabrata, lebbi ɗiɗi miɗo ɗaɓɓita. Mi ɗaɓɓiti haa mi ronki. Mi ɗaɓɓitiino haa jooni mi acciino hulude maayugol. Mi fini e nder jemmaare goo, mi miijii : « Ngurdanɗan hittaa e an, maa hara mi suɓike mayde nden maa yiitugol miñan an Alhasana, si mi yiitaali mo haray sitta mi maayude. »