13

Fow-fow mun ko duuɓi ɗiɗi mi waɗi Cankoy. Wonnde yumma an si faalaama lootaade, ko min wallitotooɓe, mi wallinaɓe e ɓoggi, mi wallaɓe cuɗaade. Ko min ƴoogoyta, ka woyndu, ko min teenoyta, ko min aynata na’i ɗin, lawƴa miranji ɗin. Ko nii golle suudu. E cuuɗi heewuɗi ko sonnaaɓe ɓen waɗata, kono min hari ka amen ko min waɗata.

      E ɗen golle fow no woodunoo welayɗe lan: ko bammbugol minñiraaɓe an ɓen. Ka amen ko wudere bammbirte. Ɗo’o mi yi’ataa ɗun fota. Afiriki fow no waawi waɗude ɗun. Hino metti fii seeɗa kono mo waɗii nde laabi ɗiɗi maa tati o taway sattaa fii. Ko yo tawu tun hara wudere nden no juuti.

      Ko minñiraaɓe ɗiɗo mi mari: Faatumata Binta et Ruqiyatu, mi sikki tun hari mi haalanii ma. Ko Ruqiyatu woni tosooko on, nde meɗen nodda mo ko Ru-qi-ya-tu men wi’ata. Faatumata Binta ko kanko ɓuri mawnude ko mo duuɓi tati maa nayi. Si meɗen noddude mo, men diway Faatumata on, men inna tun Binta.

      Minñiraaɓe an jiwɓe ɓen kañun naataali lekkol, kono ko mi sakkitii yewtidude e Binta ka talifon o innanno himo faalaa fuɗɗaade lekkol. « No haani », mi jaabiimo, « jooni a njanɗii hiɗa haani yahugol ka lekkol. Si nettoyii a ekkitoto mecce. » « Wano honɗun e mecce ? », o lanndii lan. « Wana ño’ugol, wano boroderii, ɗii ɗoo welete honno ? » « Eyyo. »

      O jonni talifon on Ruqiyatu, on lanndii lan si tawii ñannde goo men yiiday. Mi jaabii mo : « Si Alla jaɓii, ko ɗun mi faalaa. » O watti ɗon himo miijoo fii an ñannde woo ñannde, o ronku seedugol e miijo ngoon. « Ko fii honɗun si tawii ko fii an miijotoɗaa hinaa fii Alhasana ? » « Mi waawataa jaabaade ngal lanndal ɗon, ko woni tun kotoo mi sikki an e neene hiɗon suuɗin-mi goɗɗun. »

      Wa jooni haray Rugiyatu heɓii duuɓi sappo-e-go’o maa sappo-e-ɗiɗi, mi fellitaa.