19

Mi yi’aali batte Alhasana ka saare Sabrata. Mi aadii yahygol Jaawiya.

      Jaawiya no ɓadii Sabrata, ko seppuru jemma gooto. Si ko ñalorma mi anndaa ittiri saa’i on sabu welataa fii. Poliisiiɓe ɓen nanngay soka maa piya hela yi’al, ɓay hara hiɗa woni ka a haanaa wonude.

      Mi habbii jemma. Miɗo miijo : « Jaawiya », e naange liiƴoyii.

Mi seppi, senngo ley ɗatal ngal, wonndude e piiji tati : ndaarugol, yahugol e daragol. Ndaarugol, yahugol e daragol. Ɗii ɗoo tati, mi waɗuno ɗun laabi buy.

      Leere jowaɓo on bimmbi yonii, hay e gooto alaa ka ɗatal, hari no deƴƴi. Ko leere jeegaɓo, tawi mi fuɗɗii ronkude. Ka sera ɗatal, mi haccii juulirde e leggal no darii binnde mayre. Hita on lanndo lan ko honto, niwre e leggal, hay huunde si wonaa ɗii ɗoo ɗiɗi. Mi miijii, kisan yo mi yahu mi suuɗoo ɗon. Mi ugginii, mi ndaari binnde leggal ngal fow : « Hay e gooto alaa ɗoo, yo mi munno seeɗa. » Segondaaji tati. « Mi udditaɗe haaju welaa fii. » Hay e gooto alaa ɗoo. Mi munnii kadi, tun mi ɗaanii haa leere jeenayaɓo.

      Ko mi finata, hari leggal ngal no ɗoo, ka binnde juulirde. Huunde alaa e dillude, hari miɗo huli. Libii si neeɓii huunde dillaali, haray moƴƴaa. Ko ɓuri moƴƴude ko yo mi yahu, ko bee mi yaha mi miiji wonnde mi neeɓii ɗoo fota non.

      Ka leere sappaɓo maa ka sappoo e go’aɓo, miɗo seppa e ley ngee naange. Yaasi kin no wuli kat, no wuliri wa yiite. Saa’i kala pikkoppuwal feƴƴa, mi ugginoo fii hita ɓe yi’ay, mi inna : « Allaahu akubar, ngal feƴƴii. »

      Mi wattoo e maggal kadi. No mi yaarata non, mi watti nanude batte teppe. Mi yeƴƴitii, mi yi’i nayeejo no ara. Mi gunndi, fahin mi gunndi nafaali. Nafaali juuɗe ɗiɗi fawii e balawal an. Juuɗe ɗiɗi e goɗun goo : « Mi nanngaa ma. »

      O fuɗɗori e aarabu : « Barka lafi. » Mi waawataa aarabu moƴƴa, ko woni mo hiwrike lan mi hiwritoto. « Accee hakkee, mi faamaali ko wi’u ɗon. » « Barka lafok ? », o lanndii lan. Mi jaabii mo : « No. » « No ? » « No. » O towni julba makko on, o holli lan kalasnikow makko on. Julba ko doleeke mo worɓe ɓen fawata e hoore conci, yeru wakkee hun. Kalasnikow ɗun ɗon hiɗa anndi.

O ƴawni lan e nder kat-katwal, ko Golf ? ko Ford ? Mi annditaa. Ko woni ko otowal njanal, yeeso no ɓaarii pinkaaje. Mi jooɗii ɓaawo. O yewtin-mi aarabu, huundee mi alaa faamude.