23

Mi woni ɗon balɗe jeenay. Min e gertooje ɗen, gerto teemeɗɗe. Gertooje wembiiɗe. Nnde wonnde mi wonay ñallalngal fow hara mi ñaamaali. Mawɗo on aroya tumbere jemma o addorana lan bireedi hoy gokkoynii. O lanndoo lan si gertooje goo maayaali. Mi jaaboo hay gootal maayaali. O nunna, o hoota. Si o wontirii ka yaasi, o soka laaki on sokanɗe ɗiɗi, klak, klak.

Mawɗo on ari jemma ñallal sappaɓal ngal, adanori lan biskiti. Mi ñaami biskitiije ɗen, mi yari ndiyan seeɗa. Mawɗo on fuɗɗii limude kartonji mun ɗin : « go’o, ɗiɗi, tati, nayi… » Mi anndaa ko jelu o limi, hawri talifon makko on waɗii hito. Miɗo annditi, benii gertoojeɗen jowtii wemmbere. Mawɗo on fuɗii sonkude : « Aloo ! Aloo ! Aloo ! » Laabi tati himo jokkindira, o wubbi, o yalti himo doga. O coowii, o waɗɗii motooru makko ndun himo heñii.

      O yeggiti ommbugol baafal ngal. O waɗaali klak laabi ɗiɗi.

      Mi faami kisan, kono mi habbii seeɗa. Minittaaji noogay, cappanɗe-tati, cappanɗe-nay, mi anndaa yeru saa’i mo mi habbii on. Mi wonu tun haa mi hoolii mi felliti. Mi ndaari mi tawi oo mawɗo alaa e artude, mi dogi mi suuɗii.

      Mi wattani yilla fee an mi tawi e hino leɗɗe seeɗa no waɗi ko wa’i wa pitahun e ɓaawo tulun njaare. Toonin, miɗo haccoo ndayguuji hoɗo ngon : « Jaawiya. » Mi miijii kisan, « yo mi jippoyo ton mi yaha yahu ka daaka Trankilo Baaba Hasan. » Mi waɗi ɗun heña-heña, yalla-yalla.

      Ko mi naatata ka Trankilo, mi yeƴƴitii e nga’al go’o, mi tawi : « Mi seedii e mawɗo on, kono kulol ngol lutti. »

Gila nden ñannde mi ɗo wuuri wonndude e ngol kulol. Kulol hita mi fottitu e on mawɗo. Sabu si men fottii o ittay fittaandu an ndun. Taf. Hara gasii. Wurin o aamataa. Ngol kulol haani no loori e nder ɓanndu an. Wonnde si mi ɗaanike, mi annditay, anitoo lan. Mi yi’a mawɗo on e gertooje makko ɗen, gerto teemeɗɗe wemmbiiɗe watii e makko.