8

Mi hewti Timiya’un e saa’i jeegaɓo on. Mi yi’i juulirde mawnde, mi wi’itii : « Ko yo mi yahu mi juula nder ton. » Mi naati.

      Min, no hitti e an ka mi juula, hinaa yiingon hinaa fii yo inne : « Iburaahiima juulii, ko julɗo moƴƴo. » Julde nden ko hakkunde an min e taguɗo on woni.

      Ɓay mi gaynii juulude mawɗo ɓadii lan inni : « A salaam alaykum. » « Wa alaykum salam. » O ndaari o tawi mi kensaa fota, o okkim-mi huntere bireedi e njaram dimɗe. Mi inni mo : « Sukuran. » Mi moɗi huntere bireedi nden heƴa. Mi yahi mi waalii ɗon e banwal. E hino peccal ngal, e hino ɓanndu an ndun, e hino saa’i. Lereeji jeeɗiɗi. Hay e gooto memminaali lan.

Ko mi finata, hari koyɗe an ɗen ɓuutirii wa mawba. Mi ndaari mi tawi yahugol welaa fii, kono mi etii mi yalti ka nder juulirde, mi njobbii haa ka hoɗo, wurin mi anndaa no mi yaari. Ɓay mi fewnditike e yeeso cukalel, jooɗiingel e damal restoran ngel wi’im-mi : « Ko a ginenaajo. » Mi jaabii : « Eyyo ko mi ginenaajo. » « Koyɗe maa ɗen no ɓuuti. » « Eyyo. » O naati ka nder restoran, o yaltidi e sarbeetihun e ndiyan wuluɗan. O ɗabbani lan koyɗe ɗen gila dow haa ley ɗe ɗiɗiinon. Hay huunde o wi’aali lan.

      Ka o gaynata ɗon, o lanndii lan e pular : « Ko honno wi’ete-ɗaa ? » « Ko Iburaahiima, an le ? » « Min Isma’iila. »