16

« Nador, coggu ngun no yombi ɓuri ɗoo. » Ko Maalinaajo inni-mi ɗun Tanje. Mi miijitii kisan, « si tawii ko non woniri, ko honnɗun ɗaɓɓataa ɗoo ? », wurin mi hoolaanooki mo. Kono mi wakkilii tun mi yahi ƴewtoyagol.

      Fof-fof mun mi waɗuno lebbi jeegoo Nador ka ley leɗɗe (fitaare). Ko mi yi’iri kon gite an ɗen, welaa sifaade.

      Ñiiri maaro, ka haala amen ko ɗun innoton e euskara « arroza », reeduujo, innon ɗun « haurdun dagoen emakumea. »

      Hari ko alaare, maa no gasa aseweere, mi annditaa. Sonnaaɓe ɓen hari no defude ñiiri. Nden ñannde ko ka leere jowaɓo mi immii fii ƴoogoygol ndiyan, e telen leere sappo e go’aɓo hari ñiiri ndin ɓenndii ka hoore wureere. Kala kutii rottirkun mun kun no fadii rottaneede. Hari wonii balɗe ɗiɗi men ñaamaali. Ko fewndo ɗon goɗɗo maƴi no sonka, « doje, doje. » Mi yeƴƴitii, mi yi’i ɗee kamiyonje poliisi. Tawi ɗe huttitii men.

      Kala weddii miranhun mun kun, caawi. Min mi habbii seeɗa. Ko mi dawunooɗo ƴoogoyi adi colliɗin finude, bimmbihun kun fow sonnaaɓe ɓen no yangaade defa. Mi aadii mi accirtaa ndee wureere poliisiiɓe ɓen. Mi kutii ka leydi linsere, mi harli, mi waɗi tekkere, ko neene an ekkitunoo lan no tekkirtee. Mi kutii wureere nden mi ronndii, mi caawi ka geeɗe. Poliisiiɓe ɓen iwtiri ɓaawo an no haaca ko waawi : « Daro, taburkimok, daro. » Taburkimok, e haala aarabu, ko hoyre.

      Mi heɓi arsike moolanaaɗo ɓe nanngaali lan, mi sikki tun worɓe ɓen fow laawino. Ko rewɓe ɓen nanngaa. Ko hasii kon ko non wonirta ka ley leɗɗe. Sonnaaɓe ɓen waawataa dogude acca ɓiɓɓe mun ɓen, ko bee ɓe bammba ɓe, ɓe doga. Maa ɓe jogitooɓe, ɓe dogida e maɓɓe kono ɗun no tonnga ɓe. Nden ñannde Nador rewɓe buy naɓano.

      Ɓay leereeji tati maa nayi feƴƴii, men fuɗɗii artude ka ley leɗɗe. Men tawi miranhoy amen fow fusaama. Poliisiiɓe ɓen fusi kala ko ɓe waawi fusude, ɓe eesiri goɗɗun goo kaaƴee nanndi fii hita men ñaamu. Ko ɗon goɗɗo e amen fuɗɗii, kisan lanndaande : « Ko honto ñiiri ndin woni, en accuno wureere nden doguɗen, ko honno warri ? » « Ɓee bummbulaa ɓe waray men, men fow. » Bummbula ko junnitti innugol poliisi.

      Hari miɗo suuɗii e ɓaawo leggal, mi nani fow. Ɓay mi yaltitii, ɓe fow ɓe sooƴi : « Eeeeee, garan Elhaj ! A suuɗuno wuureere nden ? Wiiw garan Iburahima ! » Mi joɗɗini wureere nden ka leydi fow ɓadii.