14

Mi wonuno Cankoy haa mi heɓi duuɓi sappo-e-jeegoo, miɗo ayna dammi e na’i, wuppana minñiraaɓe an ɓen. Alhasana wallanno moƴƴa. Nde wonnde wonnde si tawi men alaa golle buy, men ɓanna julle, men jooɗoo, men yewta. Si arano on wii : « Aduna welaa fii. » Oya jaaboo : « Eyo, welaafii. » Men toppitoo ɗon e yewtugol fii no men ñinnirta aroore amen.

      « Alhasana hiɗa haani janngude, gite maa ɗen no njannde, hiɗa welli faaminnde piiji buy. » Ko mi faaleteeno mo innude ko himo mari hakkille, kono mi anndaa si o faamii. Ko woni tun hari miɗo faamude wonnde hakkille makko ɗen no yaajude.

      Ñannde goo o innin-mi : « Kotoo min kadi ñannde goo mi wallitoto ma. » « Walliraa lan honno ? », mi lanndii mo. « Ko mecce mi faalaa waɗude. » « Mecce honɗe ? » « Mi anndaa. » O deƴƴi. Himo miijitoo alaa huunde ko o wowla tun nde wootere. O inni : « mekanik motoo. » « Alaa, Alhasana, hiɗa fanɗi taho a heɓɓaali duuɓi sappo-e-nayi. Hiɗa haani janngude taho. » « Awa », o jaabii.

      O suusataano yeddude lan. Kono miijooji makko ɗin no mawnude tun. Hari o faalaaka janngude hannde kadi lekkol, hari o faalaama yahude ka o yahiwoo. Mi inni mo: « Alhasana, arii yahen seppen seeɗa. » E nder ko men seppata kon, mi fuɗɗii mo yewtude fii an. Ko honno gila ko mi mari duuɓi jowi haa duuɓi sappo-e-tati, ko honno mi wuurirnoo ka binnde taabun baaba’en ka binnde laawol. E no mi wonirnoo e nder lebbi jeegoo Labiriyaa wonndude e kamiyonwal Tamba ngal, misiforanii mo wano no mi wonumaa e siforanaade nii.

      O jaabii lan : « Ɗun ɗon fow mi anndii. »

Ñannde tawi yumma amen hettii giyaa seeɗa, ɗun woni ko ɗuyti ligge an ɗen ka nder suudu. Woni haa kiikiiɗe mi ɓadiiɓe, mi inni : « Neene yaafee lan. » « Ko honɗun waɗi ? » « E nder ko mi miijitotoo kon, mi taw yo mi yahu taho Konaakiri mi ƴewtoyoo ton. » Neene deƴƴi ko juuti, ɓe ugginii. Mi ɓeyditi : « Eyyo neene, Konaakiri. Miɗo tamƴinii mi heɓoyayton no mi gerda, mi heɓa mbuukoy seeɗa, si wonaa ɗun Alhasana accitay lekkol. » Fewndo ko mi wowla ɗun, hari neene an no mbojjude. Ɓe ɓantii ɓe waawii lan ka balawal.

      Bimmbi mun mi yahi Konaakiri.