9

A yi’ii oo suka jooɗiiɗo too e jullere leɗɗe ?

      Ko Usmaan, ko lebbi ɗiɗi nii himo arude ka werde Irun (Euskal Herria-Leydi Bask). Himo wonndi e caɗelee ɗen fow, o ɓuttinaali. Ñallal ngal fow o wowlataa hay huunde si hinaa fii lanndagol sigareeti wol, ko fow non, o yeggitii ko lutti kon. No woodi innayɓe o feetii. Eyyo feetere. No weli wowlude. Kono min miɗo annditani mo. Miɗo faami mo.

      Sabu, min kadi, miɗo anndi ko woni bonireede haqqille, si haqqille ruuyii, hiɗe metti hewtitaade. Sifaaɓe makko buy mi yi’ii. Libii, Aljerii, Marokku, mi yi’ii yimɓe yurmuɓe, boyraaɓe, ɓe tawata ko mayde nden ɓurani ɗun. Kono hara hiɓe wuuri. Hiɓe wuuri hay si ɓe anndaa ko fii honɗun, ko fii hommbo. Ɗo’o kadi ko wano non.

      Ndaarii, Usmaan, hannde kadi himo jooɗii ka jullere leɗɗe, hiɗa sutii mo ? Ko honɗun o woni e miijitaade ? Taw si o yeggitay koo ko woni anitaade mo fow ?

Ka laawol, men yi’ii fureeji buy. Goɗɗi ka jeerennde, goɗɗi ka hoore baharu. Mayɓe ɓen no ton, menen meɗen ɗo’o, meɗen dillude, ko ɗun senndi men. Fii kala dillere amen nden ko goɗɗo doftii. Si o innii men, « yahee too », men yaha. Si o innii men, « aree ɗo’o », men ara. Hara hay men lanndaaki fii honɗun. Ñalɗi ɗin no feƴƴude. Meɗen jooɗii e jullere, no wutta sigareetiwol haa goɗɗoo yamira men goɗɗun goo.

Deeƴere ko e kallakun cewkun fiɓii, fii hita kun taƴu welaa fii. Ko fii ɗun hannde si mi jooɗii binnde makko mi inni mo : « Jogito haa satta Usmaan. » Mi etii yewtugol mo, waajoo mo fii yo’o faamu. O jaabii : « Kotoo, hannde kadi ngurndan an ɗan moƴƴitata. » Mi deƴƴi ko juuti, ɓay miɗo faami ko o wonndi kon. Miɗo faami ko o wowli e ko o deƴƴi. Ɗee lette ɗoo no tiiɗani aaden gooto.

      Si a sonjorii nii an tigi, a nawnay. Hoore maa nden accete hiɗa jooɗii e hoore julere leggal, nde wiira nde yaha fes. No gasa nde ronka artude. Yimɓe ɓen rewoyay binnde maa, ɓe inna ko a feetuɗo. Eyyo feeteere, ɓe huutoray ngol konngol, maa gonngol goo. No welifii haa feƴƴiti.