2

Hari ko men worɓe ɗiɗo ka nder suudu, hinaa men tato, ɗiɗo pet. Jooni non luttii min tun. Miɗo mari minñiraaɓe ɗiɗo jiwɓe e neene an. Kono mi waawataa innude neene an yo wallito lan. Ko gorko waawi waɗude kon, debbo waawataa waɗude ɗun. Ko ɗun mi anndinaa. Ko bee mi yewte googa, Afiriki, hinaa gootun hayrugol miñan mun woni gorko, woni debbo. Hinaa fii monee on, kono sokola on e miijooji ɗin. Si mi innii miijooji, ko donngal miijooji, e ko tawi kon haray ɗoo e yeeso no farlii ka ontigi tammbitoo ɓeynguure nden. Sabu miɗo anndi fota, gila Alhasana yoolii ka maayo, ko min tun heddii liggotooɗo. Jooni ko farilla e an wano farlori heewuɓe.

      Ko woni tun hari hinaa ngol laawol ɗoo mi suɓii, hari hinaa ɗun ɗoo woni fodaari an ndin. Hinaa Libii, hinaa Eroppu. Mi faalano hara ko e doginngol kamiyon mi heɓata ngurndan an ɗan, gila Konaakiri haa Serekore, e gila Serekore haa Konaakiri. Wonndude e ɗee mecce, mi waawayno wallude ɓeynguure nden. Kono hawri Alhasana dogii e min mi yaltii ɗaɓɓitugol mo.

      Si mi yiituno mo, men jooɗodayno, mi yewta mo. Mi yewta mo ko juuti, gila ko men jibinaa haa hannde, mi yewtayno mo piiji buy e men ƴettodayno pehe fii ɓantal amen. Mi yewtayno mo haa o faama, ɓay ko min woni dikkuru ndun hakkunde amen.

      Kono mi piyataano mo, wano Baaba’en amen faalirtenoo yo mi waɗu, maa yumma amen. Ko hay nde wootere mi piyaali Alhasana. Min hari baaba’en piyay lan tumawoo. Ko woni tun, mi waawataano warrude wa baaba’en an, maa yumma an no seytiniranaynoo lan non. Yumma an maakayno : « Jooni non junngo maa ngon wonii junngo baaba’en maa ngon. Si o bonnii, hiɗa haani mo piyude fii yo o faamu o bonnii. » Si ɓe maakiino, mi nunnayno, mi jaba, kono mi piyataano mo.

      Go’o, baaba’en kañun, no joginoo sentiirwol njanol. Ɗiɗi mi alaano doole piyugol goɗɗo. Tati, hinaa mi baaba’en. Ko ɗun si tawi hari mi jooɗoto tun yeeso Alhasana, mi yewta mo wano no mi wonir-maa e yewtude nii.

      Si mi yiituno Alhasana, mi yewtayno mo kadi. Mi yewtirayno mo gite ɗen. Ɗon konngol woo yaltataa.