16

Ɓay mi hewtii Sabrata, neɗɗo nanndu e an, ɓadii lan. O inni yo mi jokku mo si tawii ko laawol yaadu Eroppu mi faalaa. Hari himo anndi ka yimɓe ɓen yeeyetee ɗon. Mi lanndii mo : « Baaba Hasan ? » O nunniri hoore nden, « ko ton wonuɗen e yahude. »

Daaka Baaba Hasan on no mawni, hiɗa waawi waalaade ka faalaɗaa woo, ndelo ngon ko njaare. Si a ɓantii gite ko duule ɗen yi’ataa. Si a ndaarir nano ko safaariyankooɓe tun yi’ataa. Ka ñaamo ko huunde wootere nden. Nder ton hari ko men temeɗɗe jeego e nder ɓen, no hen, ginenaaɓe buy.

      Adi mi yahude mi waaloo, ɓe lanndii innde an. « Balde Iburaahiima. » « Duuɓi maa ? » « Sappo e jeeɗiɗi. » Wonunooɗo e winndude on no mari ba’ii juutungii, wa’i wa si o sikkitoto seeɗa. O lannditii lan fahin : « Ko e hitaande honnde jibinaɗaa ? » « Ñannde 4, 8, 1999, Konaakiri. » « Awa », o jaabii, o winndi ɗun. Gila nden ñannde duuɓi an ɗin no ɗuytori duuɓi jowi.

      Ko Aljerii mi tinndinaa ɗun wonnde : « Libii no moƴƴi ka neɗɗo inna o heɓaali duuɓi sappo e jeetati. Fii hita o nannge o sokee, fii yo ontigi wuuru. » Ko ɗun si tawi, yeeso oo neɗɗo mo waare ko e hitaande 1999. Mi waylaali ñalaande nden e lewru ndun : ñannde nay, lewru ogsatu (ut).

      Nettaali, o lanndii lan fensitugol. Kono hari moggo mi yanii ɗoyngol. Huunde hari mi alaa e faamude. Mi maanditaaki ko men waddunoo kon ko mi annditi kon e mun ko o inni lan kon : « Gila ɗoo, ko min Baaba Hasan jeyumaa, e a yahataa ka hay e gooto fii ɗaɓɓere laawol. Coggu maa ngun ko Baaba Hasan hottotoo ngu. Tuma yoɓaa woo a yeetete nde yahataa. » « Awa. » Hay mi haalanaali mo ko fii honɗun mi arani Libii, si wonaa ɗun o ferotono lan ka yaasii, maa o ƴettayno leggal o hela lan ƴi’al e ɓanndu an dun.

      Ɗun ko ko ɓe woowi, ɓe maray safaariyankeeɓe ɓen Sabrata haa ɓe heɓa feere no ɓe lummbinira ɓe. Si neɗɗo naatii e daaka hiwrike laawol haray lannii. Goɗɗo goo lummbintaama hannde kadi.

Ñannde goore, goɗɗo wi’in-mi wonndema portooɓe ɓen no yoɓi mbuuɗi buy fii libinaaɓe ɓen yo jaggu safaariyankooɓe ɓen. No wona hara ko fii ɗun si kasooji Libii ɗin no heewi tef yimɓe wa’uɓe wa min. Mi anndaa non si ko goonga. Huunde mi humpitaaki e dawru ngun (polikki), kono Libii welaa faamude.

      Libii ko kaso moolanaango mo naatii, welaa yaltugol. No wuuri.