17

Lebbi buy feƴƴi mi humpitaaki Alhasana miñan an. Bimmbiire goreejo an ari tawi lan ka gaaraasi. Ko jumaare, ko e nden ñalaande men waylata nebban ɗan ka kamiyon. O ewin-mi : « Iburaahiima ! », mi yeƴƴitii tun. O inni : « Yumma maa noddii, ɓe humpitike Alhasana. » « Yoo ! » « Eyyo ! Alhasana no Libii. »

      Mi deƴƴi taho seeɗa. Si mi inni : « Himo Libii ! »

      Mi taƴi foofaango, daande an nden wa’i wa si ŋaɗay. « Ko paykun, ko mi sakkitii mo yi’ude hari o alaa ɓuri duuɓi sappo-e-nayi. Ko honɗun oo yahi ɗaɓɓugol Libii ? E ko honno oo heɓiri miijo yahugol Libii ? O yaha ton hara wurin hay e huunde o haalanaali lan. Hinaa ɗun men haldunoo. » Miɗo miijoo ɗun fow, e kadi : « Ko honno oo yaari haa Libii o alaa mbuuɗi ? »

      Ka fanaa mi noddi yumma an. « Neene, ko hommbo inni on wonnde Alhasana yahii Libii ? » « Iburaahiima men yewtidii, ko kanko tigi haalanin-mi. » « Hiɗon felliti on faamuno moƴƴa ? » Lanndal an ngal monini neene seeɗa. « Iburaahiima, e a hoolaaki ko neene maa yewtumaa kon ? »

      Mi jaabiiɓe alaa. Kono hari mi hoolaaki sabu yumma an haa hannde yi’aali natal Afiriki. Ɓe senndindiraa woɗɗeendi ndin si wi’aa-ma ɗoo e Libii. Mo innii ɓe ɗoo ko Libii, ko Alserii, e ɗoo ko Marook. Ko ɓe jaaboto maa ko awa. Kono ɓe anndataa ko honto.

      Ɓe fillitanii lan : « Iburaahiima, Alhasana no Libii. » Ɓe jonnin-mi rewro talifon. « Ko e ngoo rewro Alhasana noddin-mi, noddu mo ndaaraa si on yewtay. » « Awa », mi jaabii ɓe.

      Ɓay mi roccinii mi miijii: « Himo Libii. » Libii.