18

Laabiiji tati miɗo noddude rewro ngo yumma an jonnin-mi ngon, hay gooto jaabaaki. Ka nayaɓun goɗɗo jaabii : « Aloo ? » Mi lanndii mo : « Alhasana Balde ? » « Habbee mi nodda mo. » Mi nani himo ewnoo Alhasana Balde. Nettaali o ƴetti talifon on.

      Ɓay men fuɗɗii yewtude, paykun kun fuɗɗii kisan wullude.

      « Miñan ko honɗun yahuɗaa waɗoygol Libii ? », mi lanndii mo. O inni lan ko Eroppu o faalano yahude. « E ko Eroppu falaaɗaa yahude, hay a haalanaali lan ? » O jaabii lan yo mi yaafo-mo hari ko wallitagol lan o faandii. Kono hari o anndaa no o gerda goo. « Miñan ko Alla tun waawata en wallude, hinaa hay e gooto. » « Miɗo anndi », o jaabii. Si o watti ɗon.

      « Kotoo ko huunde wootere pet mi tori maa, hita weddito e neene, hitaa miijo hay huunde, hita a miijo fii ko mi acciti lekkol, maa ko mi yalti kon. Ko ndaarugol si mi heɓɓay laawol no mi wallira en mi woni. Fii enen kadi yo en hayfin, mi tawu moƴƴere alanaa en si mi jooɗike ɗon, nafataa en. » « Miɗo anndi, miñan, ɗun ɗon fow miɗo anndi. »

      Neeɓaali mbuuɗi ɗin ka talifon hari fuɗɗii lannude. Mi lanndii mo ko honto o woni. O jaabii wonndema himo ka innetee Sabrata, e nder daral feruɓe mawnngal inneteengal Baaba Hasan, haa si o yi’i laawol no o lummbira baharu on. « Wattan hiila, miñan. Mi torike ma mi jeejii ma. » « Awa mi wattanay hiila, mi fodii ma », o jaabii.

Balɗe tati maa nayi ɓawto mun, mi jokkiti mo. Mi ƴetti kaaruhun dogaykun Konaakiri-Sigiri. E saa’i sappaɓo on.