4

Emi, ko kamerunaajo, ko Sabrata mi anndi mo, ka Trankilo Baaba Hasan. Fewndo ɗoo mi anndaa ka o woni, mi anndaa si himo wuuri. No gasa hara himo wuuri inch’Alla. Ko kanko yaltini lan e nder ngoo maayo soɓungo Libii.

      « Iburaahiima, hiɗa piiridude e jinnaaji », o inni lan.

      Emi no joginoo pehe e gonnguɗi wonnde o welaa jentaade. « Iburaahiima, hiɗa ɗaɓɓitude ko a yiitataa, maa hara jooni ko goɗɗun goo wonuɗaa e ɗaɓɓitude. » « Mi faamaali ma Emi », mi jaabii mo. « Ko lette wonuɗaa ɗaɓɓude, goɗɗo no haanumaa nanngude piya, maa soka, maa letta. » « Ee ! » « Eyyo hiɗa ronnditii donngal ngal a fonndaa, hiɗa hatonjini yo goɗɗo lette mayrugal. Fii yo a artu, yo a tabitu. » O deƴƴi segonduuji tati, maa nay, o ɓeyditi. « Hiɗa haani ndaarude no wuuriraa, yaltaa e nder ngoo maayo soɓungo ngo yolliɗaa, tippaa ka hoore leyɗi, tabitaa, wattaa hulude, watta muuseede wano hedditiiɓe ɓen. » « A anndaa ko muusata lan Emi », mi jaabii mo, « a majjiraaka minñiraawo wano min. » « Ko goonga maa, konnguɗi ɗin mettanii fii Emi. O watti, mi yewtirte e noone goo. Hiɗa waawi jokkude lan, janngo yaaden golle ? »

      O sifanii lan wonnde moggo Sabrata, nokku ka innetee Zinta, himo anndi gollirde (santiyee). Patoron on ko aarabuujo kono o nanndaa e ɓe mi anndi ɓen. O fodi wonnde o sifanto mo o inna ko mi goreejo makko, no gasa o jaɓa ƴettugol lan golle. « Ko bee mi miijitoo », mi inni mo.

      O aamaali o fadii lan.

      « A miijitike ? », o lanndii lan. « Eyyo, mi miijitike, mi yahataa e on santiyee. Miɗo anndi ka mi laawii ɗon miɗo huli fottugol e wa’uɓe non. » « Iburaahiima, hay si a hulaali ton, hay e gooto piyataama, a gollay e kadi a yoɓete. » « A ƴettanii lan gaaranti ? » « Eyyo ! » « Awa. Mi wakkilii. »

      Bimmbi mun mi yaadi e Emi gollugol. Ñallal ngal fow meɗen adude tuufe (birki) ƴettaɗe joɗɗina, ƴettaaɗe joɗɗinaa. Ko ɗun woni golle ɗen. Ɗun ɗon e Alhasana. Si mi innii Alhasana, ko fii derfere an nden mi woni e hollude.

      Kiikiiɗeere mi ɓadii Emi, mi inni mo : « Mi haaɓii ɗoo, mi faala yiltaade Aljerii, a wallay lan mi heɓa no mi yaara ? » « Awa», o jaabii lan.