8

Ka daral otooje Konaakiri, oto no heewi nder ton, yaarayɗe cenɗe fow. Mi jooɗii e jullere (ban) e ndaarugol yiiloonde nden ( wiiruwaaruure). Mi miijitii : « Yo mi yaaru Labiriyaa. » Wurin mi anndaa fii honnɗun kaa ko ɓay innde nden no weli wowlude. Sarlon no juuti seeɗa, Koddiwaaru men. E hoore ɗun hari goɗɗo wi’iino lan wonndema paykun no mari neweende e heɓugol golle Labiriyaa. Miɗo tamƴinii ko fii ɗun mi suɓori Labiriyaa hay si tawii jooni hinaa mi paykun. Miɗo mari duuɓi sappo-e-tati.

      E hoore parabiriisi kaaruhun mi y’i no winndii : Li-be-ri-a. Kono ɓay mi ɓadike doginoowo on (sofer) o hayli hoore wi’ugol : « Mi naɓortaa ma hiɗa fanɗi panndi. » Mi wi’i ma wonndema miɗo mari duuɓi sappo-e-tati. « Hiɗa fanɗi », o tentini.

      Mi sattini seeɗa, yiltii o lanndii lan si tawi miɗo e ɓeynguure ton. Mi jaabii mo oo’o. « E ko fii honɗun yahantaa ton ? » « Hiɗon hettanoo seeɗa mi sifanoo on ? », mi lanndii mo. « Kaaruhun kun yahay e nder minittaaji noogay e jeetati. » « Oke », mi sifanii mo fii an.

      O jentii fow. O jaɓi : « Mi naɓorte, kono ko ka ñiwre wenngotoɗaa, ka hoore dolle. » Mi jarnimo fota, mi fuɗɗii kissan pepaade ƴawa. Afiriki wa’aa wa ɗo’o, ton dolle ɗen yowete ka hoore otooje naɓoree.

Waliisiije ɗen fow no tummbo dow. Mi jooɗii ka sera koyɗe an ɗen no junnitii no leera. Ko yaadu woɗɗundu, balɗe tati. Boɓi ɗin muusanno seeɗa, hoore nden kadi wuli. E nder balɗe tati mi miijino piiji ɗuuɗuɗi. Go’o, fii honɗun mi suɓanii Labiriyaa ? Ɗiɗi, ko honɗun mi waɗoyta si mi hewtii ton ? Tati, ko honno mi acciri yumma an, Alhasana, Faatumata Binta e Rugiyatu ka suudu ? Nayi, ko honnde say men hewtata ?

      Ɓay kaaruhun kun fuɗɗii ñeegaade. Ɗun ko e hoore subaka hawri, goɗɗo ewnii : « Monrowia », yimɓe ɓen fow cippii. Doginoowo yawi cippingol dolle ɗen jonnita mo kala. O wi’in-mi wonndema min kadi mi hewtii. Mi inni « oke », mi hoccii mi cikkii ka leydi.