25

Hari ko jumaare.

      Mi waali ka Trankilo Baaba Hasan. Ɓay weetii mi immii fii yahugol ka juulirde. Juula juma on. Wonannde men, julde juma no hitti haa. Meɗen woopa ɗeya julɗe, kono hinaa ndee nde juma. Ɓay gaynaama juuleede, mi ruttii ka Trankilo rewrude e ɗatoy faaɗukoy koy Sabrata. Miɗo wonndunoo e goreejo an goo, pullo, jammaaɗo Dimedi. « Iburaahiima », o noddi lan. « Naa », mi nootiimo. « Hiɗa tampi fota non, yimɓe ɓen fow no suuɗudema ko ɓe anndi. Min mi faalete yewtude ma. »

      Men ɗuyti palanɗe amen ɗen, mi lannditii mo : « Honɗun ? » « Mahin tun ? » « Oo’o. Ko hommbo woni lan e suuɗude honɗun ? Si hiɗa anndi mi jeejii ma jewtan. » « Eyyo, mi haalante. Kono jento lan, sabu ko huunde hittunde lan, nde mi marunoo ka nder ɓernde an, an kadi hiɗa haani nde marude ka nder ɓerde maa. » Miɗo punnii mo wa tufoowo fala. « Awa », mi watti ɗon, « fuɗɗo. »

      Miɗo jentii.

      « Ko minñiraawo maa aruɗaa ɗaɓɓitugol honno ? » « Eyyo. » « Miɗo anndi miñan maa, men wonndii ɗoo ko juuti, ko menen waalidaynoo, min mi waaloo ɗoo, kanko o waaloo ɗaa, men suddoo wootere. Mi anndaano himo mari kotiraawo. Hay nde wootere o yewtaali lan fii makko. Kono ɗoo mi faamii ko a kotoo makko. Miɗo sutii ko sonjiɗaa kon gila naatuɗa e nder leydi Libii. Oo sonjaa fow fii kun paykun gootun. » Gaynugol makko wowlugol ɗun ɗoo, o deƴƴi. Miɗo jentii mo, mi miijii : go’o, Alhasana no e nder kaso. Ɗiɗi, mi yahanay o ka o woniwoo. Tati, mi yaltinay mo kaso, men hoota Gine. « Hiɗa anndi ka o woni ? », mi lannditii. « Oo’o, mi anndaa ka o woni, kono mi humpitino wonndema laakun kun waɗuno nofrase. »

      Ko e pular o woni lan e yewtude si wonaa ngol konngol nofaraasi. Ko nden ñannde go’o mi fuɗɗii ngol nanude. Mi lannditii mo : « Ngol konngol ngol wowluɗaa ɗoo, ko honɗun ngol firi ? » « Welaa fii. Ko si laakun waɗii aksidan, ko non fow wowlirta, ɓe inna nofaraasi. » « Nofaraasi ? » « Ey, nofaraasi. » Mi mijjii seeɗa, mi lanndii mo : « Ko ɗun wonni Alhasana hari bakike ? » « A faami moƴƴa non ko mi woni e haalude kon, kono mi gaynaali. Alhasana hari hinaa kañun tun. Hari ko ɓe teemedere e cappaɗe nayo e nayo. »

Nofaraasi. Ko aranun ɗun non yo mi nanu ngol konngol. Yimɓe teemedere e cappaɗe nayo e nayo. Mi miijataa wa ɓen fow no heƴa e koy laakoy. Mi sikkaano wano ɓen yimɓe fow heƴay e sifa koy laakoy. Nden ñannde mi ɓeydino gannde ɗiɗi, mi miijii ɗun ɗon yonii fii nden ñannde. Mi inni : « En yahay trankilo ? » Men yahi ka Baaba Hasan.

      Mi waalii, mi lappii e kartonri, mi ommbi gite an ɗen, koyɗi bonɗi jurii lan. Hari mi faamaali : « Miñan, ko fii honnɗun faandorɗaa yaadu Erop ? Hinaa ɗun halduno ɗen, mi innuno an a janngay, mi innuno hiɗa njanɗi gite. »

      Ey, gite njane, duuɓi sappo e nay pet. Ko mi sakkitii mo yi’ude hari ko paykun.

      Mi fuɗɗii tappude kaydiiri ndin, wa’i wa si hakkille an dirtii. Si hakkile dirtii ɗe welaa artirde : « Ko adii kon, mi hayrii baaba’en an Konaakiri, jooni non miñan an Libii. Ko honno mi wowliranta ɗun yumma an ? »

      Nettaali fahin, hakkille an ɗen jottii, ɗe jottorii seeɗa-seeɗa, mi annditi fii ɓee yimɓe teemedere e cappanɗe nay e nayo no ɗuuɗi, « waawaa wonude. » Mi immii, mi yahi, mi yiidi e goreejo an goo, mi lanndii mo : « Enee mussiɗɗo, e miijo maa yimɓe teemedere e cappanɗe nayi e nayo no waawi ƴawude e nder laakun ? » « Iburaahiima, ɗun hinaa huunde non wonannde laakun, Libii ɗoo a yi’ay hay teemedere e cappanɗe jeetati e nder laakun gootun. Ɓe tawa kadi ɗun no haananiɓe. » « Awa », mi yaltini fotoo miñan an on ka jiiba, mi inni mo : « Jooni non wowlanan goonga, a waɗii ɗoo lebbi buy, Sabrata ɗoo, hara hiɗa anndi miñan an ? » O ndaari foto on haa juuti-luggi, o ndaari lan seeɗa. O miijitii ko neeɓi, o jaabii : « Alaa mi anndaa mo. »