18

Ko balɗe ɗiɗi mi woni Sabrata. Ton balɗe ɗiɗi no juuti. Juuti ɓuri jeerennde e anngal ndiyan. Sabu a dillataa. Ko yo a seppu. Daroɗaa. Lummbitaa laawol goo. Dogaa, suuɗuɗaa, daroyoɗa, e cokke laawol goo ndaaraa. A yi’ataa ko jokkumaa. Aarabuuɓe ɓen fow suuɗike. Kono pelet hiɗa anndi hiɓe bakitii nokku goo. Neeɓataa nanaa hito loowannde, hara a anndaa ka nde iwri.

      Jemma. Fii ko jemma, ɗun deƴƴataa. Tuma kala nanaa hito loowannde. Maƴaa kulol. Kulol mawngol. Ɓay hara hiɗa ka hoore ɗatal. Yaaraa nokku goo. Dartoɗaa. Ndaaraa saare nden. Saare nden deeƴa. Neɓataa kural aata. Maƴaa. Dillaa. Dartoɗaa. Bakitoɗaa hiɗa ƴeewa. Huunde a yi’ataa wonira non haa ɗaanoɗaa ka wontirɗaawoo.

      Fahin hito loowale ɗiɗi. Taf-taf. Finaa. Dillaa ɗon. A anndaa ka yaaraa. « Miɗo faalaa yiltitaade ka daaka Baaba Hasana Trankilo. » Ndaaraa saare nden fow. Huunde alaa dillude. « Ko fii honɗun mi arani ɗoo ? » Noddaa Alhassane. Hawa joluɗo laabiiji ɗiɗi. Nanaa hito loowannde. Taf. Deƴƴaa. « Acce hakkee. » A hulii. Hito maa ngon tigi watti ma hulɓinnde. Batte teppe maa ɗen watti ma hulɓinnde. « Alhasana, Alhasana, Alhasana ko honto wonuɗaa ? » Tawaa hiɗa haani dillude. Dillaa. Hay si a anndaa ka yahaa. Dartoɗaa. Maƴaa. Piitoɗaa. Talloɗaa. Waaloɗaa ɗon.

« Fuɗɗii weetude. » Udditaa yiitere wootere. E jaka hiɗa wuuri.

Sabrata ko jiɓi liɓi. Kun aalahun ko ɗoo wonata, kun ɗaa ko ɗaa, kono kuma dillataa e ɓaawo kuma, ka yaaruɗaawoo poliisi no darii. Ko kamɓe ayni saare nden. Ko kamɓe jogii aala. Ko hasii kon, ko paykoy. Paykoy tosokoy jogiikoy gerenaadiije, lukkii pinka kalasinikoow. Bimbi goɗɗo e maɓɓe darni lan ini : « On fow, onon ɓe afirikinaaɓe men sooray kural e boɓi mon, men waray on. »

      Taf-taf.