22

Jemma on fow meɗen ka hoore ndiyan, meɗen majji. Yimɓe ɓen fuɗɗii wullude, tentinii rewɓe ɓen. Wonndude e doginoowo on men. On doginoowo ko senegaalinaajo. Mi anndaa ko hommbo suɓinoo mo ardiiɗo e doginoowo. Ko woni tun, o innuno kanko himo anndi baharu on. Kono ardiiɗo no haani tawude himo deeƴi, himo suusi, kono ooɗoo, himo wullirde wa boobo. Si ko nii, karahan men hewtirta Eroppu.

      Min miɗo etaade hettitugol haqqille an ɗen fii hita mi miijo panndi, fii kala welaa fii. Tuma kala mi yiita yeeso yumma an ngon. Mi anndita wonndema Alhasana ko jemmaare yaltirnoo, jemmaare wano ndee ɗoo.

Maayo ngon no yaajiri wa jemma on. Ko woni tun jemma on kan, si a habbike seeɗa, a bakitike e cokke hun, neeɓataa hara weetii, ɓantaa hoore tawaa haani baharu on kan dillaali. Miijoɗaa waawaa wonude.

Nettaali laakun kun fuɗɗii yaltude. Doginoowo on inni yo kala dillu ka jooɗii ɗon. E nder ɗun, a pew laakun kun yooloo. Yimɓe ɓen fow no sooƴude nettaali ɓe wulli. Min kadi. Hari kulol njanol no jurii lan haa ka ƴi’e. Mi natti mi ndaari cenɗe ɗen fow, fow ko gootun. Waawaa wonude.

      Woɓɓe no ɓornii wakkeehoy moƴƴiniraa koy buna, woɓɓe no dattii sabrayeer weloo ka ɓaawo. Min, hari mi jogaaki hay e huunde. Anngal ɗun hari no beyditii kulol an ngol. Mi innitii wonndema tama’u an daɗugol no sewi ka heddiiɓe ɓen woni.

Leere sappo e go’aɓo e fus. Huunde waylaali.

Leere sappo e ɗiɗaɓo e fus, miɗo fadii mayde nden tentinii. Ɓay mi ñoƴƴirii kolli an ɗin laakun poore kun, mi faami wonndema henndu alaa ton hari hikun ɓiiraade few.

Leere sappo e tataɓo huunde waylaali. Fahin miɗo fadii mayde.