15

Ɓay pikoopuwal hebulike, men ardiniraa wa maakiti yeeyeteeɗo. Ɓe fawi e hoore amen baasiwil poore teddungii. Ngii baasiiwii no luuɓi fun teewu sumungu. Men suutaaki huunde yeeso amen, huunde e ko woni ka kene. Mi ɓittii haa mi seytini. Nettaali mi fetti nder ton, « mi waawataa yaarude nii, hara mi sutaaki ka mi sutii ton. » Doginoowo ƴetti finnkaari makko ndin kalasinikow, o hellii laa e hoore. A yi’ii ɗoo, haanii miɗo wonndi e ɓattatere nden. O sonnkanin-mi : « Si a hoolaaki ko Sabrata mi naɓete ko fii hunɗun ƴawanɗaa ka oto an ? » « Awa, acca nan », mi jaabii mo. Wonuɓe ɓen ka nder otowal fow fanki. Ko nii ɓe deƴƴinirta yimɓe ɓen. Huunde a waawataa wowlude.

      Mi anndaa emmbere saa’i ko men doki kon. Ndayngu hay fus men sutaaki. E hiin-le neɗɗo mo sutaaki ndaygu, anndataa saa’i wonaaɗo e mun. E hino baasiiwil ngii, e hino niwre nden, e hino luuri teewu sunnaangu ngun. Ko mi anndunoo fow, ko barme an on ka hoore e ƴiiƴan fuɗɗiiɗan yoorude ɗan.

      E nder ko men yahata kon, pikoppuwal ngal darii, ko niwre, ko jeerennde. Ɓe inni ko yo men jippo wonndema hino heddanii men kilomeeter sappo-e-ɗiɗi maa sappo-e-tati ɗon e Sabrata : « Gila ɗoo ko koyɗe yaaroton. » Ɓe watti ɗon : « Yalla, heña, heña ko yo on hewton adi naange ngen fuɗude. » Ton ko sariya, si poliisi on nanngii neɗɗo haray o hewtoyii Debdeb, maa ɓe soka ontigi.

      Doginoowo on holli men laawol ngol, o sapporingol finkaari makko ndin. O wi’i : « Habiibii, heña, yalla, yalla, nay, jowi, jeegoo. » O holli men montor makko on : « Yalla, yalla, rewree nii. » Men wattii e maggal, men dogi. Yaasi kin no wuli, e hin meɗen ɗonɗaa nokku ka ndiyan alaa, e hin men darataako. E hino ko ka leere nayaɓo men woni e hin yalla, yalla.

      Men hewti Sabrata e leere jeegaɓo on, menen jeegoo aranɓe ɓen. Ko menen ɗon hewti. Ɓeya hedditii hari men acciiɓe ɓaawo ka tummbo jeerende. Men accidiiɓe e poliisi, maa ɗonka, maa ko mi anndaa.