3

Mi yiɗaa wurin yewtude fii ɗun, sabu hari mi suusataa baaba’en an. Ɓe maakayno: « Iburaahiima hita waɗu huunde kaari », mi ronka nde waɗude. Kono wonnde mi yeggita mi waɗa ko mi hajaa kon. Baaba’en an fii sifa ɗun hiɓe marunoo mbowka woota, ɓe itta duhol ngol (sentir) ɓe maaka : « Iburaahiima lappo ka leydi. » « Dakor », mi jaaboo ɓe, mi ɗoftoo. Ɓe focca lan loyru jowi maa ndu sappo. Miɗo anndunoo ko fii honɗun mi focciraa, mi etoo fii wota wattu.

      Baaba’en naataali lekkol, koɗun si tawunoo hiɓe seytinaynoo fota si mi yaali ka lekkol. Si ɓe hewtitiino kiikiiɗe ɓe lanndotono : « Iburaahiima, hannde a yahuno ka lekkol ? » Min le ko goonga mi haalanaynoo ɓe : « Eyyo mi yahuno. » Si ko asko mun mi inna : « Alaa, baaba’en, mi yahaano, hari miɗo fijude balon min e goreeɓe an ɓen. »

      Ko woni, adi mi jaabaade, haray baaba’en an no anndi fow, sabu haray tuuba an mban no tuuni tus. Si woniino haa ɓe iwtii juulugol geeƴe, ɓe maaka : « Iburaahiima hiɗa anndi ko haanuɗaa waɗude. » Mi lappo ka leydi, ɓe itta duhol ngol. Ɓe focca lan ngol jowi maa ngol sappo, haa ɓaawo ngon wula seeɗa. Ontuma ɓe daditoo duhol maɓɓe ngol. Ɓe ruƴƴa si ɓe huyloo.

      Miɗo yiɗunoo baaba’en an. Kamɓe kadi hiɓe yiɗunoo lan.

      Bimmbi, ko kamɓe tun finndinaynoo lan. Ɓe ɓadoo lan, ɓe maaka : «Iburaahiima, saa’i immagol fewndike. » Mi immotono, mi juula, mi yaha ka lekkol. Lekkol hinaa ko weli fii few, ko e faransiire tun ɓe jannata men. Faransiire e piiji tati kadi. Aranun ɗun ko honno laawol taƴitirtee. « Ko yo ontigi ndaara nano e ñaamo si o taƴita. » Dun ɗon mi ɗo annditi. Ɗimmun ɗun, meɗen jannetenoo teddinngol yimɓe ɓen, sabu ko ɗun haani. E tammun ɗun… mi yeggitii, mi annditaa niinii, ko woni tun miɗo felliti ko huunde hittunoode. Ko ɗin piiji tati men jannetenoo ka lekkol.

      Hari ko lekkol hawtaaɗo (pibilik) kono adi mi feƴƴude ka suudu jeegaɓuru, hari mi accitii ɓay hari ballo woo alaa. Ballalngal ko jawdi. E hin-le wonotaako e ɓaawo jawdi. Mi faalano jokkitaade yaadu lekkol kono hari gasataa.