10

E nder balɗe tati, mi ronndii kartonji dimɗe ɗuuɗuɗi. Balawal ngal muusim-mi. Hari talaataare maa alarbaare, mi maanditaaki hannde kadi. Neɗɗo mo mi yi’unoo on ka gaaraasi ari ka maakiti. Mi yaawaali mo yi’ude hawri miɗo ronndaade donngii njanii. O jokkim-mi, mi faamaali. Ɓay mi rowtirike, o noddim-mi : « Iburaahiima. » Mi yeƴƴitii.

      O lanndii lan : « A soƴƴii ? » « Oo’owoye. » O naɓɓin-mi ka restoran. O lanndii yo ɓe rotan men ñiiri fii amen men ɗiɗo, men fewtondiri, men ñaami e miran gooto. « Iburaahiima, mi yiɗaa yi’ude hiɗa waɗa sifa ɗee golle, hino teddan maa panndi. » « Miɗo anndi ɗun, kono hinaa e sago an. » « Si hiɗa faalaa a aray mi ƴette aparenti. »

      Ngol sagarawol haala ko ahordi an golle arane ɗen nii.

Oo neɗɗo ko Tamba Tengiyano o innetee, kamiyonwal ngal o doginta ngal ko Behn. Behn ko kamiyonwil njanii, hari non miɗo fanɗi haa fii doginngol ngal, kono hari no woodi piihoy cewkoy buy koy mi waawata waɗude e maggal. Wano waɗugol nebban, hebbinngol henndu e pinee, wallitagol fii haɓɓugol dolle ɗen. Si tawii mi waawataa haɓɓude mi ƴawa ka ñiwre dow mi jooɗoo. Tamba wi’a : « Ñannde goo a waaway. »

      En nder lebbi jeegoo ɗi mi waɗi karallaagal, mi faamuno ƴoyrehoy buy humondirkoy e kamiyon. E ƴoyre hoy humondirkoy e yimɓe ɓen. E misal, Tamba hari hinaa julɗo, o janngataa aayeeje alqur’aana, o juulata waqtuuji ɗin jowi. Ko e diina goo o jeyanoo dinaa katoliki. Katolikiiɓe ɓen ko noone goo, mbowka goo. Tamba hari sifanto lan fii maɓɓe fota non. Kono mi inna mo : « Tamba hay si a maapaaki kamiyon maa on no njanɗi fota non o waaway ƴettude yimɓe buy non. »

      Tamba hari ko neɗɗo moƴƴo. Mi anndaa hay no mi jarnirta mo moƴƴere nde o waɗani lan nden. O faggin-mi, o holtinin-mi, o hoɗnin-mi ka ɓeynguure makko. Lebbi jeegoo mi ɗo ka makko, ka suudu makko. Tamba e sonna mun e geɗalɓe makko ɓen ɗiɗo wonii nayo. E min wonii men njowo.

      Ko ka nder saambuu ɓe waalaynoo, min mi waala ka ñallirdee hoore gatun.

Ñannde goo, mi noddi ka suudu. Neene tontii : « Aloo ? » Mi lanndii ɓe : « Ko honno wa’ani on ? » Ɓe jaabii : « Ko jam-tun. » Kono nettaali miñan an ƴetti talifon on o wi’i : « Kotoo Iburaahiima, neene alaa e jam, ɓe sellaa. Mi faamaali ko honɗun, mi anndaa ko honɗun e nawnaare, min miɗo huli seeɗa, si tawii no gasa haray hiɗa waawi arude. » « Awa », mi jaabii-mo. Fewndo ka mi wallinta ɗon talifon harii juungo an ngon ɓuuɓirii wa gilaasi. Tawi bee mi hollita Tamba.

      « Tamba, yumma an no fooyii seeɗa, mi faala yo a newnanan mi yaha Gine ƴewtoyagol ɓe. » « Iburaahiima, hiɗa fuɗɗii tun faamude seeɗa e gere kamiyon, a faalaa ma kisan yahude. » « Oo’o hinaa faale yaadu, ko ɗo’o mi wonata kono mi yahay taho, yumma an no nawni fota, Alhasana miñan an innii ko yo mi yahu. » Tamba deƴƴi ko juuti. O wi’i : « Mi faamii », kono mi faamaali ko honɗun o faami. Mi ɓeyditi: « Si hiɗa faala en nodday yewtidaa e yumma an maa an e Alhasana miñan an nden a ɓurtay faamude. » Fahin o deƴƴi kadi, nettaali o wi’i : «Mi faamii, si tawii a yahay, mi wallete. »

      O soodani lan saakuuru njanndu, o loowindu tew conci. O yooɓinin-mi mbuuɗi seeɗa. Mi watti mbuuɗi ɗin ka jiiba an, mi bambi saaku on. Mi bakii mi ari Konaakiri. Mi iwi Konaakiri, mi yahi Kankalabe e nder kaaruwal. Ɓay mi hewti Kankalabe mi seppi mi yahi Cankoy.