6

Ɓuri feccere leydi Aljerii ndin ko jeerennde. Maali kadi. Ko no yaarataa non anndirtaa jeerennde hinaa wootere. Jeerennde nden Maali, no heewi tef fureeji, maayugol no welifii e mayre ɓuri wuurugol. A luttay yahude tun henndu jaɓɓoo ɓanndu maa ndun, koyɗe ɗen iroo. Aljerii le, ɗate no ciifaa, fii kamiyonje, fii kaaruuje, fii pikoppuuje ɗen, fii fow, e fii maa hay an. Laawol waɗaangol ndole no taƴiti jeerennde nden. Ka sera ɗatal a yi’ay cahoy buy, cahoy Aljerinaaɓe. Cuuɗi loope ɗarluɗe, ɗate ndoliraaɗe loope siman, juulirde, e ƴoogirde. A waaway hebbinnde miran bidonhun kun liitir jowi, jokkitoɗaa e laawol maa.

      Mi seppi e nder balɗe jeegoo, gila Urgla haa Gara’iya, kiloo teemedere e cappanɗe jeenay. Fus mi alaa ko mi ñaama sinaa miɗo yara ndiyan. Kono ɗun hinaa huunde e an, sabu jooni mi anndii heege warataa neɗɗo ko yaawi. Wa’aa wa muuseeendi. Fii yo neɗɗo on maayu, ko bee feere goo.

Wonnde mi fuɗɗoto miijitaade, mi lannditoo : « Ko honɗi e ɗii ɗiɗi ɓuri, heege e muuseendi ? » Mi ndaara mi tawa hakkunnde ɗin ɗon ɗiɗi ko heege ngen ɓuri muusude, ey, heege ngen. Sabuna heege hersataa, si a weelaama, a waɗay ko woni woo fii yo a heɓu ko ñaamaa. Si a muusaama, a fadoto seeɗa jebbiloɗaa. Si naa fii, muuseendiiji ɗin fow nanndaa jebbilannde.