5

Mi ruttii Aljerii e nder pikuppuwal, min tun e doginoowo aarabuujo. O inni lan yo mi ƴawu yeeso, mi waɗi ɗun. Witirje otowal ngal no niɓɓintinaa, wontirɗo ɓaawo yi’ataa, fus nder ton, kono an wontirɗo nder on a yi’ay. Ka nder ‘Land cruiser’ a yi’ay ko woni woo.

      Kono ton alaa huunde ko ndaaree, fow ko jeerennde. Alaa ko wonaa njaare ko ila e njaare heɓi e njaare. Si tawii hannde en yahii ton an e min, a lanndike lan yo mi naɓe Alserii, mi yi’ataa laawol ngol. Mi yi’ay jeerende kono mi anndataa ka mi yaara. Aarabuujo, kanko eyyo sabu aarabu no anndi jeerennde.

      Adi men hewtude ka keerol, otowal ngal darii e koɗolun, doginoowo on yamiri-mi : « Cippo. » Mi waɗi ɗun. « Libii ko ɗoo hatti », o ɓeyditi, « gila ɗoo, ko koyɗe yaarataa. » « Awa. »

      Min hari ɗun sattaa e an sabu hari mi feƴƴirii no ɗoo miɗo jokki ginenaaɓe ɗiɗo, e nder jemmaare. Miɗo anndi ko honno keerol ngol lumbirtee. E saa’i sappo e jeeɗiɗi on, mi ƴoogi ndiyan ka keerol Gadames, mi wattii e maggal mi seppi.

      Mi lummbi jemma, gila gaɗa haa gaanin e nder njaareendi. Mi hewti Aljerii ka hoore subakahun ka fewndo peeral. Mo no iwri Libii, Aljerii ko Debdeb.

Ka daral Debdeb, e cokkehun ƴoogirde ndiyan no ɗon. « Yo mi yahu mi juula ɗoo », mi ƴettoyi anniyee. Mi sutii ka juulirde. Adi yo neɗɗo juulu o salligoto : o loota yeeso ngon. Laabi tati. Juuɗe ɗen laabi tati. Haa ka soɓɓundu junngo. O maska hoore nden. O ɓuɓɓina nde wootere, kono ndiyan ɗan no haani yahude haa ka ƴi’al hoore. O sakkitora lootugol koyɗe ɗen. O lootaɗe laabi tati. Si ɗun ɗon gasii, a waaway tun non juulude.

      Ko ɗun mi waɗi fii weltanagol Taguɗo on. Libii, lannii.