9

Isma’iila ko paykun sertu kun e hedditiiɓe ɓen. Yimɓe no serta, Isma’iila no jeyaa e ɓen. Ko mi yiidata e Isma’iila hari ko mo duuɓi sappo-e-nayi e hari himo fanɗi. Ko ɗun waɗi si mi ɗo inna mo paykun. Jooni nii mi anndaa ko duuɓi jelu o mari no gasa sappo-e-jeegoo maa sappo-e-jeeɗiɗi. Baaba’en maakanayno lan wonnde saa’i on hinaa o gooto wonannde fow e jaka ɗun ko haqiiqa.

      Min e Isma’iila men wonnduno lebbi jeegoo. Gila Timiya’un haa Kardiya. Ko ɗon men seedi. Gila ɗun mi yiitaali mo. Ko woni tun jooni, si koyɗe an ɗen ɓuutii seeɗa, mi annditay fii makko.

      Go’o, sabu ko o ɗabbannoo lan koyɗe ɗen gila dow haa ley, e nder balɗe tati jokkondirɗe. Ɗiɗi, nde tawnoo mi waawii wattaade paɗe mi seppa. Mi seppira doy-doy haa koyɗe ɗen wowti, ɗe acci muusude. Tati, ɓay ko kanko holli lan ka mi heɓa golle. E hino ko kun paykun (Isma’iila) waɗani lan kon.

      O inni lan : « Timiya’un, golle den ko ka binnde laawol woni. Mahin hay en dillataa, habboɗen. » « Awa. » « A yi-ay, a heɓay golle heña. » Men habbii seeɗa minitti, gooto, maa ɗiɗi, mawɗo ari binnde amen, e nder kamiyonhun kikkun. O yaadi e amen haa e mowre njaare, o inni : « Hebbinee buruyeeti on naɓon ka an. »

      Yaadu kala o yoɓay lan teemeɗɗe ɗiɗi mbuudi diinaar. Temeɗɗe ɗiɗi dinaar ko yeru leereeji ɗiɗi golle ɗo’o wonnde hara no ɓuri. Ñanndewoo men waɗay tuuruuji nayi. Ɗun ko yeru teemeɗɗe jeetati dinaar, telen euro jeegoo.

      Men golliri non e nder jonte tati hebbinngol, buruyeetiiru wayloya. Ka yontere nayaɓere men yahi Bordji.