Errak, Pilale

KARRANKARRAKA

        «Iguzki begi-gorria mendi-gibeletik keinuka baizik-ez ari eta...

        »Etxeko patarrari behera, karranka-karran-karraka, norat hoa bain goizik, orgen gainean xutik eta zintzur-indar guziez kantuz?

        — Lanerat.

        — Zer? lanerat hoin airos? Iguzkia samin izanen duk egun: zer izerdi-urak ixuri beharko ditukan landa idor hoitan!

        — Zer uste duzu: ala... horren beldur naizela ni?

        — Ederra zaik beraz hiri bizia?... Ai, Pilale, lanerat kantuz doana Jainkoaren adiskide duk. Biziari eta biziko eginbideri irriz dagonak Izpiritu Saindua bere dik.

        — Alo ba! Ene baitan baitut nik Izpiritu Saindua? Alta, ez zait iduri, Mendekoste iraganik ere, Hamahiru-garren Apostolu bat naizela.

        — Ez, ez... Ehaiz Apostolu handi hoitarik, ez. Heieri, haundizki eta denen jakinean, jautsi zitzaiotekan Izpiritu Saindua; hiri aldiz denen ixilik eta Jaunak dakien izarian. Heiek bazituztekan beren eginbideak: mundu guziaren, predikatuz, argitzea eta Jainkoratzea; hik: lanerat joatea, lanerat gogotik joatea eta, lanerat joanez, hire gisan munduaren salbatzea.

        — Munduaren salbatzea?

        — Hire otoitzak, hire izerdiak deneri, mundu guzikoeri zaizkiotek baliatzen. Ari haiz horrela, hi bertze Fededun guziekin, mundu guziaren salbatzen eta Jainkoratzen.

        — Alaintso! hori jakinki-ta, azkarkiago ere eginen dut goizetan kantu.

        — Bai, kantu egizak, Pilale. Kantu egizak eta erakuts munduko jende mokor eta mutur guzieri bizia ederra dela.

        »Kantu egizak eta erakuts, dohatsu izaiteko, ez dela errege-bidetan ala beribil ederretan ibiltze beharrik.

        »Kantu egizak eta erakuts, Izpiritu Saindua barnean duenarentzat, lana maitagarri dela, eginbidea laketgarri eta den orga-biderik txarrena Zeru-bide zabala bezein xoragarri.

        »Kantu egizak eta hail, orgen gainean xutik, Apostolu bat bezein iguzkitsu, karranka-karran-karranka.»

Aita Txi

1-6-50