NOIZ OTE?

Noiz ote, otez-ote, noiz joanen gare ote

                Gainez-gain otez-ote?

Biak su, biak odol, noiz joanen gare ote

Hegoak joan ostoak bil-ta-bildu arte?

Haiz-hego, haitz-osto... Zato, Matai, zato:

Goazen arrai, goazen anai, goazen ostoz osto.

Haiz-hego, haitz-osto... Goazen larrez goiti

Ostoz-osto goazen eta... dugun Haitza bezti.

Noiz ote, otez-ote, noiz joanen gare ote

                Gainez-gain otez-ote?

Biak su, biak odol, noiz joanen gare ote

Hegoak joan ostoak bil-ta-bildu arte?

Haiz-hego, haitz-osto... Ez gaiten hain zoro:

Nola eta nork bil ote haitz-ostoak oro?

Haiz-hego, haitz-osto... Goazen larrez goiti

Lanoz-lano joanez dugun... lurra Jainkoz busti.

Noiz ote, otez-ote, noiz joanen gare ote

                Gainez-gain otez-ote?

Biak su, biak odol, noiz joanen gare ote

Lanoez goitiko Jaun hartarat arte?

                    * * *

        Ez du soinurik, ez du jauzirik

                Nihor pitz-arazi

        Ez du elerik, ez du kanturik

                Haitzik lorarazi.

        Egin intzire, egin irrintzin

                Haitza dadin bizi.

        Egin lan, egin oihu, egin otoitz gurekin

                Lurra dadin Jainkoz busti.

        Egin dei, egin indar, egin auhen gurekin

                Haitza dadin lorez bezti;

                Eta orai, eta gero eta beti

                Sor diten sor haitz-ostoak

                Eta orai, eta gero eta beti

                Haz ditzan haz haitz-erroak

        Negu-gabeko, nausi-gabeko, neuri-gabeko

                Amodioaren Amodioak.

30-1-51