BESOAK ZABAL

                Frantses Zabierekoa mintzo...

                «Gauaz besoak zabal

                ikusten zuten

                izarrer so, nigarrez...»

Zabal gauez gau besoak, zabal eta luza:

Izar dirdirez goitiko Jaunarekin mintza.

Zabal nasaiki besoak, zabal eta luza

Zabal dakizun zabalki eihartu bihotza.

Nitan zabiltzan indarrak eta Amets gaitza

Zergatik zutan jauzteka ez ote dabiltza?

Ez atxik hola besoak sakelan sartuak

Ez atxik, bertzez ezaxol, deplauki bilduak.

Ez atxik bihotz-erroak lurrari lotuak,

Utz, bertzen trufen lotsekin, irri eihartuak.

Entzun gauez gau, minez min, munduko oihuak:

Zure bihotza zabalik behar du munduak.

Zabal besoak zabalik, zabal eta luza:

Izar dirdirez goitiko Jaunak zabal beza,

Zabal, hedaraz, kraskaraz zu baitan bihotza.

Besoak zabal emazu daukazun guzia

Zure bizian sar dadin Jaunaren bizia,

Zure itzalez bertzetan zeruko Argia.

Besoak zabal egizu Jaunaren nahia:

Zorion erein-beharrez guziak balia,

Gau-intziretan jauz-araz zeruko irria.

Besoak zabal joan beti, ez bizi «erdizka».

Muga, neurriak ken-zkitzu eta trufak oinka.

Besoak zabal zabalik Mundua besarka.

Zabal besoak gauez-gau, zabal eta luza:

Izar dirdirez goitiko Jaunarekin mintza.

Jaunaren lagun har zazu nere Amets gaitza,

Bertzen bihotz barnea argiz argi dadin:

Zabal besoak zabalki, zabal eta luza

Egizu beso zabalen betiko agintza.

28-1-53