BA, TTIKI...

                Ilobaren lehen

                komunione egunean

Ba ttiki ba, baditut kopetan ximurrak,

                    Matelan nigarrak.

Zertako zaude hola ottori begira,

Nahiz-eta ixuri ene so bustira

Zure begi pulliten irri garbi hura?...

Ba ttiki ba, baditut kopetan ximurrak,

                    Matelan nigarrak.

Soetan zeru-Argi ezin aski piztuz

Hemen nago histua, hemen nigar-kantuz

Munduan Amodio ezin aski piztuz.

Ba ttiki ba, baditut kopetan ximurrak,

                    Matelan nigarrak.

Egon hola, ba ttiki, ottori behaka:

Zure irri garbiaz ene soa xuka,

Bi biak gauden kantuz, Argi hurrupaka.

                    * * *

Iguzki garren sua goiz-lore bustian!...

Zure bihotz ttikian, bihotz hoin garbian

Nik erranak zaizkizu, ontuko, agian.

Sarri lehen aldikotz janen duzu Jesus.

Nahi baitzinuke zuk entzun ala ikus,

Hor zagozkit bi begiz: «Otto, nun da Jesus?»

«Mundu bat bada, ttiki, bat, bi eta hiru:

Gu gauden mundu hau lur, bertze hura zeru,

Hirugarrena berritz bai lur eta zeru.

Hirugarren mundua itxuraz lurreko:

Itxuraz ogi eta, hura jan orduko,

Zeru-Biziaz zaitzu bihotza beteko.

Hirugarren mundua zubi bat iduri,

Elgarri ezin unki munduen lokarri,

Lurtiar dohakaben zeruzko iturri.

Hirugarren mundua Jesusen bihotza:

Minez min zeru alde harek gerabiltza.

Ez dezakegu ikus ez, ai! bainan ba goza.

Hirugarren munduan ibil zaite, ttiki:

Zangoz eta bortz minez lur huntan ibilki,

Gogoz jada zerua guzietan aurki.

26-4-53