Bi gauzik onenak zer ote diran
Aste ontan Txirritak jarriyak

              1

San Tomasetan Donostiya'ra

juan naiz betiko moduan,

ni bezelako baserritarrak

asko ziran inguruan;

nere lagun bat an billatu det

meza nagusi onduan,

tabernan sartu eta zurrut bi

eran ditugun orduan,

sekula aitzen eztan seta bat

onlaxe artu genduan.

              2

«Beste lan gabe etorriya nak

juntatziâtik irekiñ,

oraindik lengo jeniyo zarrak

emen zauzkiyat nerekiñ;

iñondik ere legerik balitz

kontu bat nai nikek jakiñ:

mundu ontan bi gauzik onenak

zer ote diran, Serafiñ».

«Nik osasuna eta dirua

artuko nizkikek, Juakiñ».

              3

«Jesus! Serafiñ, ori dek ire

itz egiteko modua!

Onez onian esaten diyat,

aiñ aiz gizon onradua:

urtiak ere juan zaizkik eta

nastuba daukak burua,

konfiantza dek gauzik onena,

fiña eta segurua,

artatik asko daukan gizonak

zertarako dik dirua?».

              4

«Konfiantzakiñ gauza-karraio

baldin baziña asiko,

buruko miña igual jarri

zeure denbora guziko;

saltzen daudenak ez luke asko

zurekiñ irabaziko;

ori da gauza baliyosua

baña denbora gutxiko,

urte askuan ala ibiltzen

ez lizuteke utziko».

              5

«Baña, Serafin, xinista zazu

profeta zarren esana:

jakintsunaren arrazoietan

izan zaitia etzana;

beraz diruba berezi dezu

asko gustatzen zaitzuna;

bata-bestia istimatzia

munduan zeñen gauz ona!

Lapurrak ere ez dute iltzen

konpiantzako gizona».

              6

«Nekatu gabe jan biar badu

diru gabeko gizonak,

laxter akabo konfiantza ta

aren amigotasunak;

xinistatuta bizi gaitezen

guraso zarren esanak,

orañ bajuban asko dabiltza

lenago altu izanak,

konfiantzaren faltarik ez du

diru askoko gizonak».

              7

«Konfiantza da gizonarentzat

oso gauza egokiya,

diruba baño obiagotzat

jakintsunak edukiya;

daukan guziyak emango diyo

erariya edo jakiya,

kuidado gabe ari liteke

kendu artian plakiya,

baita're beste zernai gauza ta

lo egiteko tokiya».

              8

«Gazte denborak aldegin ziran,

allegatu zait zartzia,

argatik nai det ez dakitenak

abertentziyan zartzia:

pobriak lan du nekatu gabe

bizi-modua sortzia,

edo bestela prezisua du

etxe askotan sartzia,

beñ eman eta lotsa biar du

berriz ara etortzia».

              9

«Anaia batek bere arrebari:

Baso bat sagardo ekatzu.

Erantzun ziyon: An daukak giltza,

juanda zedorrek ar zazu;

baita iru ta lau ta bost ere

komeni baldiñ bazazu,

zu zaitutzera guazela gu

iruritutzen al zazu?

Ortik naikua berdindutzian

gora iyo ta jan zazu».

              10

«Amaika biar juan gera, Juakiñ,

periya ikusitzera,

ta berriz ere desio nuke

lagun maitien antzera;

anaia baten puestora zuaz

bei esnedun bat artzera,

konfiantzak zer esan nai duen

ongi fijatzen bazera,

emango dizu gustora baño

zorretan zuaz etxera».

              11

«Atzo juan nitzan dirurik gabe

zekor erdi bat artzera,

arakiñ zarrak eta andriak

etzuten egiñ atzera;

izketan ere tratatu naute

obispo baten antzera:

Gure morroiak eramango du

zu bizi zeran etxera,

kuidado gabe jan zazu lasai,

gizon gaiztua etzera».

              12

«Konfiantzaren alde izketan

jarduten dira batzuak,

artzen duenak berak askotan

ipiñtzen ditu plazuak;

eta denbora datorrenian

estutzen dira lazuak,

berriz bertara etorri biar

luzaturikan besuak;

dirubak eta errezibuak

bukatzen ditu bertsuak».

Bertsolariya,

[1932-01-03]