Santo Tomaseko feriya
Aste ontan Txirritak jarriyak

              1

Ahenduaren ogei ta bata

Santo Tomasen eguna,

Donostiya'ko ziudadian

jai zelebratzen deguna,

pobre ta aberats jende askori

maiz akordatzen zaiguna;

Azpeitiya'n du beste santu bat

bere antzeko laguna.

              2

Egun orretan pentsatzen bada

Donostiya'ra juatia,

kuidado gabe etorri lasai,

zabalik dago atia;

goizian plaza ikusiko da

gauza ederrez betia,

falta duena serbitutzeko

badago borondatia.

              3

Ezkonberriyak, etorri onuntz,

gure aixkire prestuak,

zuek etxian noiz ikusiko

aurrak an daude poztuak;

«Ama, guretzat zer ekarri du?»

luzaturikan eskuak;

«Ara aizezko pelotak eta

karamelozko txistuak».

              4

Bestiak diyo: «Etorri onuntz,

guk baditugu ontziyak,

marmitak eta txokolaterak,

kafetera ta paziyak,

dozena t'erdi poto zurezko

aitona zanak utziyak;

zazpigarrena eraman dute,

salduko dira guziyak».

              5

«Atoz onera, Juan Inazio,

zertako zuaz igesi?

Nik badakit zu bizi zerala

etxe oneko nagusi;

sega ederrak ogeina pezta,

nai badituzu erosi».

«Aiba bost duro, bi arrirekiñ

onen-onera berezi.

              6

Len iru duro kastatu ditut

ta orainguak bost tia,

berrogei pezta kosta zait aurten

Santo Tomas ikustia;

neri dirua gustatutzen zait

gauzaren truka uztia,

egin dan konpraz kontentu nua,

ikusi arte, gaztia.

              7

Ogei urteko semia det bat,

amaseikua bestia,

biyen tartian alabatxo bat,

ez dago oso tristia;

aita ta ama anparatzeko

txarrak izandu eztia,

oieiri beira gozatzen gera

ni ta nere emaztia».

              8

«Bost duroko bat kastatutzeko

dudan egondu etzera,

zuk orañ ere puska ederrak

daramazkitzu etxera;

ondorenguak maite dituzu

egiñagatik zartzera,

istimatuko zaitu semiak

ola portatzen bazera».

              9

San Tomasetan guazenian

teatrua ikustera,

ezin pasarik ibiltzen gera

kale batetik bestera;

arratsaldeko festa bukatu,

gabian berriz ostera,

an jakiten da nolakua dan

lege zarreko euskera.

              10

Juan dan urteko San Tomasetan

izandu nitzan perira,

bi ordu t'erdi pasa nituen

ango festari begira;

gauza zaukanak enpleatzeko

ipintzen zuen segira,

aurten etortzen diranak ere

ortan saiatuko dira.

              11

Donostiarrak ez dira egongo

Santo Tomasez antziyak;

teatru ortan ikusten dira

pareja ondo jantziyak:

oial fiñezko traje ederrak

lujo aundiyan josiyak;

festa aundiyak izango dira,

etorri danak guziyak.

              12

Toki (y) orretan bezin kontentuz

ez naiz bestetan egondu,

baña gabeko funtziyu ori

akabatzen da berandu;

bakoitzak bere andregaiari

etxera ondo lagundu,

zer esanikan ez da guretzat

ori egingo bagendu.

Bertsolariya,

[1931-12-20]