Nolatan ezagut diteken,
ea gizona hari den
bere buruaz fidatu gabe,
eta Iainkoa baitan fidaturik

LAUGARREN KAPITULUA

        Hainitzetan iduri dagoka serbitzari burupetsuari ardietsi duela bere buruaz esfidatzeko bertutea, eta Iainkoa baitako Fidanza, egiaz halakorik eztelarik, errazki ikusiko duzun bezala, zure erorteak zure baitan eginen duen obraz.

        Bada erori zarenean, asaldatzen bazare, eta tristatzen, sentitzen baduzu etsimendu zer batek zaramatzala, ezin zoazkeila aitzinago, eta ongirik ezin daidikezula, seinale ageria da zure baitan fidatu zinela, eta Iainkoa baitan ez.

        Baldin zure tristezia eta etsimendua handiak badire, zure baitan hagitz fidatu zinen, eta guti Iainkoa baitan; zeren bere baitan guti, eta Iainkoa baitan hagitz fidatu dena, erorten denean, ezta izitzen, ezta nahasten, ezta fastikatzen; ezagutzen baitu hori gertatzen zaiola bere flakotasunaz, eta Iainkoa baitan guti fidatuz; aitzitik zenbatenaz gutiago fida baita bere buruaz, hanbatenaz humilkiago fidatzen da Iainkoa baitan, eta bere falta eta pasioak desordenatuak gaitzetsirik, zeren hek direla kausa erori den, gero damu handi, ordea pausatu eta bakezko bat harturik, zeren Iainkoa ofensatu duen, bihurtzen da lehen hartu zuen lanera, eta bihotz handiago eta deliberatuago batez bere etsaiei darraizte, hek hil detzan artean.

        Nahi nuke gauza hauk ongi konsidera eta pisa baletzate bere burua espiritual dadukaten presuna batzuk, zeinek, zenbait hutsetan erori direnean, ezin har baitezakete pausurik, eta ezpaitute hartu ere nagi, eta hainitzetan lehen bere libratzeagatik bere buruari diadukoten amudioak ekhartzen duen narriotik eta grinatik, ezen ez, bertze arrazoingatik, ezpaitute behin ere laster aski ikusten bere Aita espiritualagana ioaiteko ordua; zeinagana ioan behar bailukete beregainki bere bekhatuen kutsuaren garbitzera, eta hekin kontra indar hartzera Aldareko Sakramendu guziz sainduaz.