Hautsak errautsa bezain
Itxaro Borda
Maiatz, Elebi 6, 2002ko azaroa
Adurri bazterreko harrizko hegi estuetan
Urrunetik lasterka segitzen zaituzte apurrek,
Haize buhako azkarrago batek
Zure urratsaren oinarrizko oreka desesperatua
Urera noiz bulkatuko duen galdezka.
Ibaiaren kantak dei hautematen dituzu
Bazterrak ekaitz errepikatuen ondotik
Lurrean hondamendi biltzen
Diren puloen aldetik.
Segitzen zaituzten horiek badakite
Aurki eroriko zarela
Eta lehen bezala holtzetan
Nehor ez dela zure alde
Higituko.
Eroriko zarenean erranen dute:
Bagenekien.
Munduko poeta kuttunak oro
Gonbidatzen ahalko dituzu
Lekukotasun baikor baten ekartzera
Baina mutu egonen dira,
Barka ezina zarelako.
Hautsak errautsa bezain
Itxaro Borda
Maiatz, Elebi 6, 2002ko azaroa
