Hautsak errautsa bezain
Itxaro Borda
Maiatz, Elebi 6, 2002ko azaroa

Ibaiaren eremuan txirristatzen diren egur puska

Hiroak itsasoratzen segitzen dituzu

Urratsean bazabiltzanean.

        Atlantikoa ez da urrun.

Atzoko ibaien leihorretan irakurtzen zenuen

Poeta hura nor ote zen

Eskatzen diozu uraren isuri

Elkorrari eta

Jasan ezinezko perpaus baten doloreaz

        Erditzen zara.

Uda hastapen hartan

Liburuak oro ezkin batean

Metatu dituzu bihotz handitasunez

Opari emateko

        Desertuan bizitzea egokitzen

Zitzaizula ustez:

Dena ukatzen zitzaizun

Denetarik haizatua zinen

Eta ez zenuen

Deus ezen beharrik.

        Jadanik eresia ments duzu.

        Antzara basak V bakun zeru grisean.

Eta beldur zara

Hautsak errautsa bezain

        Maite duzulako.

Hautsak errautsa bezain
Itxaro Borda
Maiatz, Elebi 6, 2002ko azaroa