Hautsak errautsa bezain
Itxaro Borda
Maiatz, Elebi 6, 2002ko azaroa

Ilunbe zohargian

Egunean zeharreko ekiz

        Zanpatu

Hegatsetako teila-sailen arteko goroldio

Mutxitu okrearen zoko urrinarekin

Nahasten da lur hil busti airea

Ibaiaren gaineko harresien maldan.

        Haritza berdetzen ari da.

Erraten dizu berriro,

        Izerdia eta euria biltzen direla

Errekaren, ibaiaren zein itsasoaren

Izate gaziaz bestelako

Ezaugarririk ez duen

        Uhinaren bila eta

Lasterrean bazabiltzanean

Zure lur nortasunaren baliogabetzea

Amesten duzula.

        Lurrak

Beste urtuaren dolorearen ordoki

Biluzietara mugatzen zaitu,

Urak aldiz etorkiko jario amniotikoen

        Aintziretara eroaten.

Hautsak errautsa bezain
Itxaro Borda
Maiatz, Elebi 6, 2002ko azaroa