Hautsak errautsa bezain
Itxaro Borda
Maiatz, Elebi 6, 2002ko azaroa

Itsasoa mundu guztian bakarra da

Zure begirada kezkatuari hargatik,

Ehun itxuraldaketaren erreinua

Oparitzen dio

        Baketu nahiko

Bazintu bezala,

Barkamenaren bidea anitza dela

Agertuz.

        Ordea barkamena

Ahulezia dela

Irakasten da eta kolpeak kolpe truk

Itzultzen direla

Duintasunaren izenean.

Barkamena ahanztearekin

Ezkontzen dela

Salatzen dizu hark

        Eta zuk

        Ibaia haina ahul amesten

Duzu zure barne ihardukia:

Itsasoan ur bilakatzeko

        Indar elkorraren beharrik

        Badea?

Barkamenak ez dakar

Memoriaren iraungitzea:

        Maita itzazu hautsak errautsa

Bezain euriak, haizeak, gizona, neguak,

Zeru grisak, aran orlegiak eta oroz gainetik

Hitzaren egiaz larruak estigmaz txertatzen

Dituzten poeten hatz mingotsak.

Hautsak errautsa bezain
Itxaro Borda
Maiatz, Elebi 6, 2002ko azaroa